中環在線：阿里百度愚人發明用蜥蜴支付將夢境還原 - 李華華
■阿里掃描支付系統
馬雲旗下阿里巴巴早前巨額入股文化中國(1060)，搞到一大班貪心嘅股民坐曬艇後，噚日再趁4月1日愚人節整蠱大家，跟內地另一間科網企業百度各自推出一項「新產品」，阿里仲要認真到拍咗條片做介紹，跟佢喺資本市場一樣，玩到出神入化。
阿里關聯公司支付寶聲稱，經過一年時間，研發出全新支付產品「KungFu」(空付)，最抵死係，阿里做咗一條相當認真嘅宣傳片去介紹，有幾位仁兄扮曬專業講解，仲要有一位係韓國人，企圖增加可信性，又話要做到「手中無劍，心中有劍」，掃描授權後，手臂紋身、頭髮、面孔，甚至拎條蜥蜴都可以用嚟支付，天馬行空到不得了。阿里公關就提醒大家噚日係愚人節喎，咁明白曬啦。
■百度還原夢境手環
■Google地圖搵比卡超
Google搵比卡超考眼力
除咗阿里之外，李彥宏旗下百度都唔執輸，喺網站推出一款，聲稱可以將夢境還原嘅百度dulife手環，話戴住佢瞓覺，條手環可以記錄低腦電波，翌日將手環進行編碼，上載百度雲，咁就可以透過視頻睇番個夢境。
百度都算有良心，當你點擊話想買呢條手環，網頁就會彈出「愚人節快樂」嘅畫面，起碼畀你知道已經被整蠱了。
雖然阿里與百度推出嘅「產品」似係科幻電影嘅道具，但多年前又有邊位諗過，𠵱家拎住部平板電腦，手指掃來掃去就可以做到好多嘢，新嘢確係要大膽想像出來。
相對阿里與百度，Google推出嘅愚人節玩意就比較平實，只係推出Google Map搵比卡超嘅遊戲，考眼力與耐力。
李華華
mailto:LiWaWa@AppleDaily.com
上一則: 樂香園：中信終極借殼 - 密西比
下一則: 中環在線：滙源邀猛人過檔曾任可樂及百事 - 李華華
中環在線 - 李華華 舊文