陸羽仁 BLOG 2014年4月7日
生化危機
2014/4/7 上午 09:37:22
網誌分類: 經濟
美股上周五要睇就業職位和生物科技股兩樣嘢。
萬眾期待的就業數據又出籠，美國勞工部上週五公佈，3月非農就業人數增加19.2萬人，高過上月的18.8萬人，接近預期的19.5萬，失業率維持在6.7%不變，差過預期的6.6%少少。不過，失業率上升，主要係有50多萬人加入勞動大軍，令到就業人數基數大升而已，表明美國就業市場正在改善當中，好多人願意搵番嘢做?
就業數據與市場預期接近，投資者鬆了口氣。富國銀行私人銀行首席投資官David Roda認為，投資者之所以感覺欣慰，係美國就業市場雖有改善，但速度唔算好快，失業率更未有明顯下降，意味著聯儲局未必會將提前加息。對股市來說，係有利因素。睇美國10年期債息由2.79厘回落至2.726厘，反映資金流出比較安全的債市，市場風險胃納有所提升。
美股昨日朝早再創歷史新高，不過，互聯網與生物技術股票的集體跳水，Netflix和TripAdvisor等動能股亦遭到大舉拋售，標普500指數由升轉跌，一路下滑至接近全日跌最低位收市，全日跌幅1.3%，收1865點，杜指跌幅細啲，跌1%或159點至16413點，納指則勁跌2.6%，收4128點。係八周以來最大單日跌幅。
若拆開嚟睇，生物科技股跌得最勁，納指生物科技股指數跌超過4%。生物科技股自2月觸及歷史高位之後，至今的累積跌幅已有18%。市場上唔少分析認為生物科技股近排跌得咁多，反而係趁機吸入的時候，因為生物科技股「才玩了一年，無理由咁快玩完。」不過，市場上也有人唔係咁樂觀，他們見到美國消費者信心在近6年來升至最高，投資人的信心也越趨增強，美國部份產業，特別係科網及生物科技的股票估值來到高點，加上投資人過度樂觀的態度，股市已起泡，生物科技股上兩周大幅回落，係泡沫爆破的先兆。
呢場生化危機，令美國股民生起爆泡疑惑，但美股有無咁快爆泡呢? 《Business Insider》網站上周比較2000年股市泡沫爆破與現時的標普500指數PE數據，以及消費者信心指數。《Business Insider》認為美股尚未起泡，2014年股市仍然穩健。
報道指2000年3月泡沫高峰期，標普500指數中的62種產業，許多產業估值過高，當中有16種產業的PE高過30倍，此外，這16種產業的市值佔了有標普指數近70%。相比之下，標普500指數現時的PE，只係略高於長期平均水準的16倍，也只是2000年3月時的一半，產業之間的狀況亦較為平穩一致，62種產業中只僅有4種，PE高過30倍，市值佔比不到4%。
美國消費者信心指數方面，3月消費者信心指數雖然已升至6年新高的92，但仍未達2005年至2007年的100，與1998年至2000年股市過熱時的140，更係相去甚遠。固此，大市目前尚無過大起泡的跡象。不過，綜觀股市任何時間點，市場上總會有估值過高的產業或熱門的股票。
睇番美國生物科技股的圖表，其實已經牛咗接近兩年半，升幅亦非常驚人，2011年8月19日，這個指數唔夠920點，今年2月25日收市2854點，勁升超過2.1倍，而且中間幾乎停都未停過，上星期五收市2357點。生物科技股的牛市，可能真係未玩完，但股票升得多就會回調，如同跌得多就會反彈，睇牌面，生物科技股現時的回調幅度，與累積升幅比較，其實只係毛毛雨，唔上番對上的高位，搏唔過。事實上，投資者開始將資金轉移至公用事業等防禦型板塊。
我的斷估是美股未咁快爆，目前只是調整，一來熱度未夠未顛夠，二來資金成本太便宜，股市較少在水浸兼未過熱時爆破。
陸羽仁
回應(2) 我想回應
陸羽仁 BLOG 舊文