青心直說：二師兄的死因 - 胡孟青
■早前豬八戒IPO之死，筆者認為足夠成為企業融資反面教材。路透社
店大欺客、客大欺店，現實中彼此咁高咁大的又如何？即使孭住中信兩個字，董事長禍從口出、開罪了大家叮噹馬頭的工行(1398)，話知你有金身護體，一樣冇運行，講錯事小，失刁事大。
今時今日IPO越大件越高危，國家隊招股反應竟然衰過清潔工和底衫褲，企業融資大哥談及上月IPO失敗的豬八戒，仍然咬牙切齒。
話說當日在賬簿打開前一天的電話會議中，有土豪私募佬，在29家包銷商、每家派兩三位同事參與的電話會議上，一派豪言，內容大致謂︰「你哋唔買，我們有大把人等著買。」眾包銷商聽在耳裏自然火都嚟埋，承銷團中更有火遮眼者在背後指，既然有份減持的私募大佬咁醒，叫佢自己賣曬佢吖笨！
翌日開book，呢位私募佬竟教班corp. fin佬點樣sell客，這種行為，簡直形同教爸媽造愛！究竟呢位仁兄係太過自以為是，抑或係掩耳盜鈴自欺欺人？一家去年負債率達286%、擺明水緊還債的公司，一些以價值投資見稱的大型基金，甫看過招股條款已即say no，尤其眾投行sales來電都係琜同一單刁，感覺會良好嗎？
接貨前，芬佬忍不住想問：「If you"re that good, you should ride with me.」高管急不及待減持，前期投資者急散水，較輝山乳業(6863)更趕，芬佬再問：「Show me the integration！Show me the value！」求你講清楚，點解咁急IPO？真的連所謂協同效應也來不及等待嗎？未見成績，為何IPO估值較早幾個月收購作價要高逾兩成？
企業融資反面教材
低買高沽冇問題，要芬佬跟民企魔盜王同坐一條船掠水做世界，不是問題，反正都是街外錢。但魔盜王跟你夾份做世界前，竟然想先做班芬佬世界，就唔妥，雖說後來縮細不賣舊股以息眾怒，但問題唔肯劈價，上下限價繼續闊達四成，明顯係等水魚，有欠誠意，即係縮細股數但售價不變，唔減價，就算沽兩層變沽一層樓，點沽？難道平時見豬八戒多過見人的民企老闆，以為芬佬個個都係二師兄？不吐不快，皆因豬八戒之死，原來涉及起碼七宗罪。豬八戒案例，足夠成為企業融資反面教材。
胡孟青
獨立股評人
上一則: 異動空間：新經濟股再衝 - 魏力
下一則: Prof J財技特訓班：財技分析系統 - 徐燦傑
青心直說 - 胡孟青 舊文