金融High Tea 2014年5月15日
你驚佢又升
2014年05月15日
呢個五窮月個個心驚驚，點知個市就玩相反，恒指再炒一日出現五連升，而且一升仲升過200點，唔怪得有人話呢一輪炒上，好似有夾倉味道啦。
呢種咁夾升市，亦係睇住大市政策味好濃嚟做，我話政策味好濃的意思，唔係只講阿爺出的政策文件或評論，而係有不同方位的部署，唔單止係政策上有動作，仲好可能係個市或其他方面配合埋，尤其見到係內地個市，喺2000點個底真係好鐵！
騰訊股價「走紅」
美國杜指近日升勢幾強橫，帶動到科技股比重高的納指，在調整之後開始回穩番。雖然美股如果夠勇，有可能試衝17000點心理關口，但由於市況已經連升多日，愈來愈多人等緊佢出現調整。
收市後，騰訊(700) 公佈截至3月底止首季業績，股東應佔盈利64.57億元人民幣，比市場預期的46.97億元為佳，按年增長60%，每股基本盈利3.5元。盈利強勁反映業務增長，以及與京東進行戰略交易的19.42億元收益，及出售文化中國股權的7.43億元收益。若睇純利按季增長17%至51.94億元，實際經營利潤率35%，純利率28%，較去年第四季的30%及26%有進步。今日騰訊拆細，由啡底股變番做紅底股，估計開市會借業績炒番轉。另外，我仍建議大家睇住納指走勢，因為騰訊股價跟美國幾隻科網巨股走，多過自行散步，納指若繼續反彈，騰訊亦有運行。
大市繼續炒中港地產股，內地多個城市推房地產鬆綁政策後，傳天津將放開第三套住房限購，內房股續向好。中國海外(688) 因此四連升，升4%；華潤置地(1109) 仲靚仔，漲6%，跑贏一眾藍籌。本地地產股就受惠港府提出修訂雙倍印花稅(DSD)，放寬「先買後賣」換樓人士而設定的「六個月」換樓期限，得以延續升勢。新地(016) 做番「紅底股」，報100.7元，升1.9%；早排因為供股插低的新世界(017) 就升3.6%，報8.6元。
經過五連升，大市終於重越牛熊線(250天線，現處22444點)，國企指數就未能企穩一萬點大關收市，恒指收報22582點，升230點，國企指數收報9991點，升135點。既然個市係炒緊阿爺護市夾淡倉，指數升到咁上下，阿爺可能會留番啲彈藥唔出住，咁投資者跟車太貼，就要小心佢突然間慢駛甚至停一停車嘞喎。你睇個市係咁夾升但成交只有600億左右，火力未夠，小心升近23000點又有回吐唞吓氣。
匯源突爆內鬥
除了大路股份，近日有隻飲品股匯源(1886) ，出現股價插水，仲搞出主席同老總不咬弦。據內地傳媒報道，匯源調整管理架構，成立戰略及經營管理委員會，由主席朱新禮兼任主席。去年才走馬上任的行政總裁蘇盈福，因此被指權力遭架空。對於市場傳聞，朱新禮於電話會議上就否認公司權鬥。
匯源近日是非不絕，公司之前公佈，以3.6億元人民幣，出售旗下飲料及瓶裝水業務，預料因出售而錄得收益約1.07億元，但就被市場質疑低價出售重要資產。
匯源曾經係內地果汁市場一哥，曾經被可樂提出收購，可惜被政府反對無法成事，市場其後一直憧憬佢賣盤，但去年公司請咗蘇盈福做總裁，好似想大展拳腳，股價一度猛抽上6.16元，市值衝破100億元。據熟悉公司情況人士話，蘇盈福曾經係另一家無上市嘅大型食品公司任職，外界買佢會搞大家公司，故此追捧股價，現時傳媒突然爆料，雖然昨日股價係4.46元止跌，暫時睇落風險仲未除。
陸羽仁
金融High Tea 舊文