Prof J財技特訓班：財技分析系統 - 徐燦傑
■筆者認為，如果睇錯市，就要將自己的分析系統調校，股民可作為參考。資料圖片
資本市場世界，財技確係五花八門，但係呢個世界只要有財技分析系統，每次將呢個系統放喺上市公司上嘅公告，就好似醫生幫你睇病，從中更加了解上市同大股東嘅心事同思路，確係非常有趣！
要搵隨時出擊股，勤力睇公告係非常重要，因為佢哋一定有少少嘢想你知！正所謂「無風不起浪」，確係要單聲你知先有意思！
統一企業(220)啱啱出咗個公告，係5供1，抽水32億元，大股東話全部照供，計埋股權比例，啱啱問小股民(或者大家可以叫自己做股市微塵，因為我哋只係識得跟大圍，金融牆邊草囉。攞9億元，再睇財務報表，一年短債到期要還9億元，學曾江話頭，「得咗」！
有人問供股同配股有乜嘢唔同，統一要供股，最主要係還短債，同埋將自己負債水平減低，方便日後再向銀行借錢，供完股，EPS低咗，但整體對公司係有利！配股就即係變相將資產折讓賣出，同時間亦都暗示呢個位，股價係大股東覺得差唔多嘅時候！供股價係4.56元，一出消息，比起以前反應係嚟得正面好多，再一次證明「有金主無苦主嘅道理」！信我，每一個公告，無論乜鬼嘢理由都好，學柯南話頭，「真相只有一個」！呢個亦係Prof J俾唔同媒體訓練出嚟嘅成果。
經驗分享與時並進
好多朋友話財技係騙局，咁樣你要界定乜嘢係「騙局」。每一樣嘢一定要去思考去跟蹤，唔係完成咗之後去將零碎嘅事組合，而諗一個解釋！正如美股天空之城，跌極都唔落，系統叫你上就要繼續往上爬！睇錯，就要將自己嘅系統調校，咁樣，先至可以有所謂21世紀嘅洞察力！有金主，有專家，我哋呢啲財技專家就係將一種經驗分享，各位老死與時並進，要做一個「三分鐘技術分析財演好容易」，不如畀心機由資本市場嘅金融同會計嘅左右手搵好股，咁咪仲好！話時話，有粉絲叫我開班教書，教財技攻略，有無人捧場先！
徐燦傑
中國銀河國際財富管理主管
本欄逢周四刊出
上一則: 青心直說：二師兄的死因 - 胡孟青
下一則: 焯焯有餘：滙控快開引擎 - 關焯照
Prof J財技特訓班 - 徐燦傑 舊文