魚樂無窮：捧小米概念揀飛毛腿 - 唐牛
■飛毛腿為小米手機生產電池，定單多到應接不暇，保守估計全年可銷售一億顆電池。圖為小米紅米手機。
港股唔聲唔聲連升五日，累積挾近千點，唐牛身處嘅炒房，久違嘅戰意開始重現。美銀美林最新基金經理調查發現，基金經理現金水平達5%，為一年以來新高。有22%基金經理處於防守mode，比起一個月前嘅11%大增一倍。由於基金唔同散戶，要有貨底先可以同客交代，從樂觀角度睇，一旦股市轉勢，呢班芬佬一定會瘋狂搶貨，屆時升勢只會更急更勁。
講今日推介前，先update一下最近嘅推介︰彩票股華彩控股(1371)搶高11%，蓄勢突破3月以來嘅下降軌，世界盃唔夠一個月就開波，睇嚟反彈有排未完；能源股威華達(622)造旗後大棍崛起，成功升抵短炒目標0.23元，有跟進嘅戰友可斬邊留邊，食盡餘下升浪；華潤水泥(1313)有靚仔業績支持，噚日再炒高4.4%，目標價5.54元不變。
定單應接不暇
路透社引述消息人士指，小米好快會推出首部平板電腦「MiPad」，咁啱小米今日喺北京舉行產品首發式，市場憧憬「MiPad」會強勢登場，有份為小米做手機配件嘅通達(698)，應聲炒高7%，同樣為小米手機生產電池嘅飛毛腿(1399)，噚日逆市跌一格，絕對有追落後空間。公司管理層披露，自從2012年轉型後，自有品牌產品最壞情況已過，更形容ODM定單多到應接不暇，保守估計全年可銷售一億顆電池；加上4G換機潮一觸即發，未來增長肯定有保證。日線圖正營造三角形走勢，今次小米新產品出籠，話唔定係破位催化劑。
唐牛
上一則: 炒友Blog：北控水務今年料豐收 - 邱古奇
下一則: 股場放大鏡：海螺創業炒入摩憧憬 - 歐陽風
魚樂無窮 - 唐牛 舊文