情陷夜中環：驗孕記 - 葉朗程
■當Danielle拿著驗孕棒入洗手間，筆者覺得時間突然變得很漫長。
圓方商場的洗手間出名乾淨，所以我們決定選擇圓方的萬寧。五一勞動節，我們吃完早餐，第一個節目就是去圓方的萬寧。Danielle步入萬寧，我在門口等著，是她叫我不用進去的。看見她搜索得這麼苦惱，我想幫忙，但我知道這不是逆她意的時候，唯有在外邊靜候。幾分鐘過去，她終於找到要找的東西，然後走到收銀處付款。
離開萬寧，我們走向最近的洗手間。「點解你個樣咁開心？」Danielle問。嚇？唔係啩？我好擔心喎。「笑住話自己擔心，you are incredible。」死，我以為自己淨係喺心裏面笑，原來自己笑咗出嚟都唔知。使唔使飲啲水先去洗手間，我問。Danielle搖搖頭，沒有望我一眼，一路沿著洗手間方向走去。
生個李梓敬係咪摑死佢
Danielle進去洗手間之後，我開始緊張起來，焦急地等待著一個人生最重要的true or false。每次有人從洗手間走出來，我都抬頭望一望。Danielle所用的時間比我想像中長很多，但看看錶，先發覺她進去才不夠三分鐘。我看看手機，又看到一篇關於李梓敬的文章，心裏突然一寒。如果我和Danielle生下一個像李梓敬一樣冇腦的，我身為爸爸，到底會唔會捨得摑死佢？
如果命運能選擇，我會想要一個怎樣的小朋友？男的、女的、動的、靜的，似我的、似Danielle的，各有各好，都冇所謂，最緊要健健康康。Wait a minute，男又好女又好，最緊要精精靈靈的。我忽然想起一個小男孩。
讀中學的時候，放學回家，偶然會有個小男孩在我家出現，是樓上的菲傭帶來的。樓上菲傭跟我家菲傭風花雪月的時候，這個小男孩就會在我家廚房玩他從家裏帶來的玩具。有時候，樓上菲傭一坐就是兩個小時，但小男孩不會叫悶，自娛能力很強。
怕小男孩躲在廚房太熱，會叫他走出來飯廳玩。我坐在飯廳做功課溫習，他就會跟我一起坐，靜靜地玩他的玩具。小男孩的面上經常掛著淘氣的笑容，精靈的眼睛彷彿藏著十萬樣鬼主意，超可愛。後來，有一晚回家，我在大廈大堂看見這個小男孩，也見到他的爸爸，才知道小男孩的精靈與淘氣，是拜父親所賜的DNA。小男孩的爸爸，乃香江第一才子。
有其父必有其子，聽落不錯，但太似我也不是好事。虛榮高傲風流倜儻惡俗犀利多金聰明壞心，缺點多過優點，虎父無犬子，似詛咒多過祝福，還是像媽媽好。獨立、堅強、大方、聰明，淨係對眼已經睇到曬所有優點。Oh my god，諗嚇都好甜，我是爸爸，Danielle就是媽媽。正當我又要從心裏笑出來之際，媽媽終於從洗手間走出來。
穿著一件黑白色的wrap dress，配一對銀色平底鞋，如果Danielle肚裏真是有個BB，我相信他也會想立刻跳出來，緊緊抱著這個雍容秀麗的媽媽。點呀，我輕輕地問。Danielle望著我，沒有透視半點喜怒哀樂。「上去飲杯嘢？」Danielle提議。點解要咁折磨我呀，講咗先得唔得，我心諗。Sure，上去podium飲？Danielle點頭，我立刻動身。
求其選一家餐廳坐下，Danielle先叫一杯西瓜汁，然後問我要甚麼。我向侍應小姐更正，「呢位小姐唔飲得西瓜汁，兩杯English breakfast tea唔該。」侍應小姐離開後，Danielle問：「點解你今日對我咁好？」我日日都對你咁好。「平時打死你都唔會幫我拎手袋。」我望著身旁這個殘舊不堪的藍色Prada包包，嘗試找個最有說服力的解釋。
算吧，還是開門見山。到底有冇BB？「有又點冇又點？」冇就冇，有就生。「嘩，你都幾霸道喎葉生，就算真係有，點解會係你幫我決定生唔生？」點敢幫你決定呀？畀嚇意見啫。「唔使畀意見啦，驗咗，冇事呀。」我突然好後悔幫佢攞咗咁耐手袋，但當然沒有表現出來。Great，嚇死我啦，幾驚你真係有咗呀，我說。
翻版葉朗程唔知仔定女
侍應小姐再出現，放低兩杯English breakfast tea。「你信唔信世界上每個人都會有命中注定的另一半？」Danielle忽然問。我想也不用想，肯定地答「唔信」。如果有命中注定嘅另一半，呢個世界就唔會有神父、和尚、and so on。「命中注定，唔等於一定會遇到，唔係乜嘢叫做有緣無份？」
咁乜嘢叫做命中注定？「喺London聽過一個神父講，上帝造人嗰陣，心裏面會諗住第二個人。」Sorry，唔明。「即係當上帝做我出嚟嘅時候，佢心裏面會諗住一個男人，而上帝做完我之後，佢就會將呢個佢諗住嘅男人做出嚟。」Interesting，然後呢？「冇然後啦。」咁你其實想講乜？「我覺得上帝做我出嚟嗰陣，佢心裏面係諗緊你。佢將我需要嘅嘢，擺曬喺你裏面。」咁大件事？「你啲反應可唔可以romantic啲呀？」嘩，你變得咁快嘅？嗰頭話我有曬你需要嘅嘢，呢頭又話人唔夠romantic。Danielle笑笑口望著我，不發一言，只是一直望著。望乜？「我好想好想睇嚇你細個個樣。」畀你睇過相囉。Danielle皺一皺眉說：「嗰啲呀？影得唔係咁靚喎，我想睇真人。」
點睇真人呀？「我裏面有個翻版葉朗程，但唔知係男版定女版。」我震驚地瞪大雙眼說：「你有咗BB？Really？Oh my god！」全個餐廳的眼睛盯著我，我立刻降低聲線。咁你頭先又話冇事，我問。Danielle伸伸舌頭說：「我話支驗孕棒冇事呀。」
葉朗程
上一則: Trader物語：揸老牌殼等財爺到 - 張士佳
下一則: 購買力回流兩日買賣升50%二手交投10個月最旺
情陷夜中環 - 葉朗程 舊文