金融High Tea 2014年5月5日
炒騰訊 睇美股啦
2014年05月05日
4月股市呆呆哋，除了炒完升炒跌之外，中國經濟狀況一直係市場關注焦點，今年阿爺經濟開局較差，但4月似乎穩定下來，上周四公佈官方的中國4月製造業採購經理指數(PMI)為50.4%，連續兩個月微升0.1個百分點。到上周六再公佈中國4月的非製造業商務活動指數為54.8%，高於榮枯線(50%)4.8個百分點，相較3月份亦升0.3個百分點。由於非製造業佔中國經濟比重漸增，非製造業有改善，進一步確立中國經濟已止住下跌趨勢。
香港的零售數據亦值得講講。剛在上周末公佈的香港3月份零售總銷貨價值為396億元，按年下跌1.3%，遠差過市場預期的增長7.4%；其實2月份零售銷貨已倒退2.2%後，業界本來預佢會反彈，點知再次錄得倒退。本港對上一次連續兩個月零售收縮，可追溯至2009年8月，那是金融海嘯尾段的困難期，如今又連續兩月收縮，反映零售業開始要捱。
零售入冬 行業要避
零售數字咁差，零售管理協會主席麥瑞琼自然牙痛咁聲，話對數據感震驚，零售業有60、70萬人手，擔心零售企業會停止招聘，或減少兼職，出現2003年沙士時的漣漪效應，會影響消費，跟住影響埋食肆，最終拖低經濟。
香港零售業進入典型的由盛轉衰周期，先幾年生意係咁急升，跟住舖租、人工都大升，生意仲升緊時唔係好覺痛，如今生意放慢，就開始見血。係生意本質轉差的問題，家香港出現反內地遊客的「驅蝗行動」，不是零售放慢的主因，主因係內地經濟放慢加上香港吸引力不再，反蝗影響只是雪上加霜。麥瑞琼話零售業經營成本高企，業主又無咁快肯減租，若然無7至8%的生意增長，商戶都捱唔到好多個月。我就話香港零售業如珠寶股都有排捱，呢啲股都唔易炒啦。
騰訊蟹民 睇錯方向
近日有唔少朋友做咗騰訊(700) 蟹，問我點睇，同時關心內地互聯網政策係點呀，騰訊做生意前景係點呀，我聽完的反應係「唔好介意我咁講，你地睇錯晒方向啦，呢啲嘢唔係影響騰訊股價最緊要的因素。」大家聽完O晒嘴，我又不妨在這裏再同大家講吓。
騰訊上日收報495.4元，離今年最高位646元，累積跌幅超過23%，如果按美股傳統標準，超過20%，已經係一隻熊樣。騰訊已經失守250天線(551元)，上日重上10天線(493元)，但企唔穩20天線的499元，再度失守10天線，未來還要尋底。關鍵問題係，究竟科技股已經爆煲？抑或只係做緊較大調整，仲可以再上高位、例如見吓1000元呢？
我在CNBC網上睇到篇文章，話美國唔少大型對沖基金，今年買科技股中咗招，後悔上錯車，結論係已經出現泡沫。文章指，繼對沖基金Greenlight Capital指美國科技股相隔15年、出現第二個「泡沫」之後，上周表現比較好嘅另一家大型對沖基金Third Point，用上了「泡沫」呢個字眼來形容大市現況，其創辦人Daniel Loeb發信畀客戶話︰「年初時對大市樂觀的睇法，似乎判斷錯誤了。部份行業估值已經明顯地出現泡沫。」Third Point的基金經理又估計，大市在聯儲局今年10月終止買債後，將會比較波動，提醒投資者，要綁好安全帶。
大印銀紙 造科技泡
咪住咪住，點解Third Point的基金經理，將科技股的泡沫帶到聯儲局嚟講呢？
原來對沖基金經理見科技股跌咗咁多，開始承認係聯儲局將利息減到零，兼加大力印銀紙，製造出科技股泡沫。如今聯儲局開始退市，科技股就開始爆泡。美國的科網股同生物科技股過去一年急升，最近呢兩三個月回落，睇反映科技股的納斯達克指數走勢已睇到晒。
睇番騰訊的股價圖，你突然會發現，佢啲走勢同納指驚人地相似，過去一年狂升後急回，從高位到家已經輸咗23%，但係仍處於不低的位置。你應該問，乜騰訊股價唔係應該同佢內地生意的狀況有關，點解同納指咁似？答案係騰訊作為一隻市值曾經超過1萬億的巨企，佢只係跟住谷歌、亞馬遜、面書等一齊行，人上佢上，人落佢落，人有泡佢有泡，唔係咁跟佢自己的生意基本因素走。結果就係人散佢散，所以要知騰訊未來係點，要先睇美國科技股未來走勢係點。
急回之後 會有後抽
美股分為反映傳統經濟的杜指和標普500指數，和反映科技股的納指。美國杜指在3月底見高回落後，家又升近高位，有作勢上穿的勢頭。相對地納指卻完全不是這回事，高位在今年3月出現後，反覆向下，未似杜指那樣收復失地，與高位仍然有一大段距離，主要原因係納指的主力科網股同生物科技股，過去一年升幅遠超杜指，這些股泡沫最大，所以回調得大(和騰訊的走勢接近)。業績理想、有錢賺的科技公司，好似facebook，股價有些反彈，其他唔賺錢的公司就彈唔起。所以科技股的弱勢，同早前升過龍有關。
不過科技股雖然跌得好傷，勢頭好弱，但又唔代表佢會一條直線咁向下滑。
要知騰訊同香港科技股點走，唔係睇內地點監管，而係要估美股杜指和納指未來的走勢。我斷估無痛苦，好難估都去估，估計有幾個。第一，係整個美股走勢，特別係科技股回落，主要同聯儲局收水有關。老實講，聯儲局在調控市場對於收水的期望方面，已經做得好成功，聯儲局由每月印錢850億美元，削減到現時的每月印450億，美股都未出現好大的動盪，未來最快到10月就會停晒所有印錢行動。
其實這只係第一浪，第二浪係明年第二季可能開始加息，而且會慢慢一直加上去。當日市場水太多，所以有概念的科技股升得特別勁，家開始收水，就有少少爆泡跡象。例如騰訊在最高位646元時，市盈率去到60倍，股價超貴，如今跌咗唔少，騰訊市盈率仲有45.7倍，其實都唔平。若睇3、4年的長線，聯儲局收完水再加息，對價貴的科網股仍有長期壓力。
第二個估計，長線雖有壓力，但中短線跌太多會反彈，如果市場適應得較好，科技股都會先後抽。特別是如果傳統股如杜指再創新高的話，科技股會跟升有一輪反彈。但我恐怕科技股高位已見，叻極都好難上穿以前的高位。比較強悍的，可能會出現雙頂後回落，弱一些的，可能只能夠反彈上跌幅的一半、甚至三分之一就再回。即使假設騰訊已見底，佢由高位跌落嚟跌了160幾元，反彈一半就係80元，即係上到560、570元後，阻力就愈來愈大。大膽去估，騰訊要上穿646元的難度相當大。
第三個估計，美國個市今年底明年初彈完會再出現第二浪下跌浪，主要係美國明年將加息。唔好理聯儲局如何去調控大家的期望，明年上半年開始加息機會好大。美國正式加息之前，預計股市會出現一輪頗大嘅震盪。到時傳統股是否仍能頂得住，都頗成問題，唔好講科技股了。
結論係若未來幾個月騰訊可能反彈，但唔好見佢好番啲時，又記住佢嘅高位，走去加碼，走去買1000元行使價的窩輪。騰訊唔好話見1000元，見番646元都唔容易。
陸羽仁
金融High Tea 舊文