中環迷你裙：順豐誓食十三麼 - Samantha
■顧客可以在順豐「嘿客」店內體驗網購「試用」，若要購買掃二維碼即可，希望消除消費者對網購的戒心。資料圖片
炒股前輩講過，賺100萬唔難，但100萬滾至1,000萬則不是人人做到，因為舊一套思維未必派得用場，要賺更多不能單靠雞糊，應是增加食自摸爆棚的可能性，或是索性將錢投進具潛力的行業。生意一樣，賺第一桶金可能靠煮得一鍋好麵，但賺千萬桶金睇怕煮一世麵都唔得，超人每日花好多時間諗未來、諗機會，因為市面上識管理公司的人，總比能發掘金礦的人多，內地物流龍頭順豐看來想做後者，尋找下個發大達的機會。大家有幾沉迷淘寶？從男議員在答問大會連女裝都睇埋可見一斑，港人喜愛順豐，貪其質素穩定，但物流斷沒專利可言，任何人都可以追上嚟，內地「德邦」和「四通一達」越追越貼，有錢到飛機都有的順豐，唔想打減價戰這種「雞糊」思維，最新一招是進軍O2O，順豐旗下新型便利店「嘿客」本周初正式開張，首批共518家遍佈全國省份。
點解Samantha覺得有得做，因為呢間係「進化版」的7-11，除順豐快件自寄自取業務外，「嘿客」還提供衣服乾洗、預訂飛機票、話費充值、交水電費都得，亮點是將來有實物商品，在店內體驗「試用」，若要購買掃二維碼即可，希望消除消費者對部份產品網購的戒心，而順豐亦可在每單生意上同商戶拆賬，若成功，順豐食盡兩家茶禮之餘，將線上、線下盲點亦可互補，有力食返鋪十三麼！
Samantha
本欄逢周一、三、五刊出
上一則: 股場放大鏡：珠管前景亮麗快起飛 - 歐陽風
下一則: 輪輪相扣：平保追落後可博
中環迷你裙 - Samantha 舊文