異動空間：點樣睇波兼炒股
世盃前夕，大折讓H股炒到出煙，兼且又係三點後開波，或是強國莊家炒完A股，再食埋港股尾水。自3月份科網退潮後，散戶周身蟹貨，魚缸缺水，港股午市頭兩個鐘，基本上可以唔睇，經紀戰友亦大呼無奈，個市一路挾上，但肯落場散戶相當少，睇淡後市、趁高沽貨者眾。相反理論去睇，即係仲有得炒？未來一個月，唔少戰友都要捱眼瞓，既睇波又炒股，面對飄忽不定的市況，可說挑戰腦力極限，點先可兩者兼顧？魏力有幾個建議：1.集中炒兩、三隻，縮注碼，即日埋單。唔夠瞓仲揸到成手股仔，贏面低過賭波。2.睇清楚先落盤，或者搵經紀代勞，傭金係貴啲，但總好過買錯隔籬。3.中午盡量小睡片刻，半個鐘都好，堅work！4.連輸三單trade後，停戰三日，因這意味閣下判斷出問題，應該休息嚇。
異動股可睇重慶機電(2722)，周線圖突破一年橫行區，昨飆9%創一年新高，兼有成交配合，靚爆！估值方面，PE唔夠七倍，五厘息，PB0.6倍，勁抵！母企擬注資，實現整體上市，值博！業務涵蓋汽車零部件、發電設備、制冷機等，內地PMI回升，對生意有幫助，掂曬！
魏力
http://www.facebook.com/2012jason
識睇一定睇蘋果嘅足動世盃：
http://worldcup2014.appledaily.com/
魏力
異動空間 - 魏力 舊文