魚樂無窮：一隻10倍PE水務股
■荷蘭同西班牙仇人見面，份外眼紅，雲佩斯肯定打甩髀。
日前推介嘅豪特保健(6880)發通告，主要股東葉治成及葉自強獲獨立第三者洽購控股，兩人連同一致行動人士持股達63.3%，如果傾得成即變相賣盤。豪特手頭淨現金達2億銀，保守估計殼價值3億銀，即叫價起碼5億銀。公司噚日爆升25%後，最新市值仍僅3.4億銀，照秤仍有大把水位。
當然，最大風險在於賣盤隨時唔成事。究竟現階段博唔博得過，唐牛認為可以吼位低吸，公司下周二放榜，由於有盈喜護身，少一個潛在風險，嚟緊兩個交易日應該係用嚟消化投機盤，可候1元樓下買入，博下周再有好消息公佈。
內地《水汙染防治行動計劃》如箭在弦，據報逾2萬億人仔嘅計劃草案已上報國務院，中滔環保(1363)成功突破橫行區，下一站直指6蚊，落後股可考慮中國疏浚(871)，現價市盈率僅10倍，日線圖大成交突破旗形，短線先試3蚊！
荷蘭受讓值博
世界盃方面，今晚共有三場賽事，焦點肯定落在上屆決賽翻版——西班牙對荷蘭身上，識揀一定揀荷蘭，三大原因如下︰1.上屆荷蘭輸畀西班牙，未能擺脫二奶宿命，今次仇人見面，份外眼紅，肯定打甩髀。2.西班牙近年以無敵姿態橫掃球壇，球員去到無慾無求階段，爭勝心成疑。3.唐牛乃死忠荷蘭粉絲，由雲巴士頓到柏金到雲佩斯，今鋪繼續撐，加上西班牙近屆大賽例牌慢熱，一於取荷蘭受讓半一下盤(1.7倍)。
唐牛
https://www.facebook.com/tongcow88
識睇一定睇蘋果嘅足動世盃：
http://worldcup2014.appledaily.com/
唐牛
魚樂無窮 - 唐牛 舊文