智取大市：洗多次牌先有機會
■筆者分析指，周一港股大跌，向下突破已發生，相信市場要洗多次牌才有生機。美聯社
前日(周一)港股大跌，大家搵唔到跌市的理由，仲估緊係咪同投票有關？姑勿論係咪中資大戶收到風知道阿爺做嘢所以要沽定貨，但當日成交增加之下出現大陰燭，向下突破就已經發生咗，牌面點都係向下嘅機會大啲。
暫欠炒上理據
另一點值得留意，前日大市成交增加至580億元，但沽空金額明顯冇多到，只得48.44億元，比起上星期四51.96億元仲要少。而當日比率係三個半月低位，只得8.35%，正常大跌市，沽空比率10%、甚至12%都唔奇。咁樣反映咗大戶都係以掟實貨為主，短線淡友追沽或短期做對沖嘅人唔多，情況比沽空多嘅時候更壞。
短線個市唔得，攤長睇嚟緊下一個半年都覺得苦惱，因為stock pick特別難做，要諗出一個有機會跑出嘅板塊、股份都唔易。港股目前五成股票冇成交，四成股票冇前景，一成股票有亮點，但已炒到天價。相信要靠市場洗多一次牌，先能令機會浮現，所以下半年格局，就係「冇危唔會有機」。下半年唔跌一鑊甘，好難有新搵食機會。
事實上，美國量化寬鬆政策，改變咗整個世界。以往環球金融體系緊密性高，1997年亞洲金融風暴，泰銖貶值感染整個新興市場；2008年金融海嘯，雷曼爆煲可以令全球市場急挫。
其後有美國QE出現，因為錢多咗，令到危機造成資金緊縮嘅情況冇以往咁嚴重，而家中國經濟差、樓市有下跌危機，歐美以至新興市場都話之你，皆因錢太多，多到某個國家有危機，其他國家都夠錢頂住，引發唔到連鎖反應。
錢太多，令歐美股市升，日股都升埋，多個新興市場表現一樣唔錯，好多市場都幾年高位。中港股照計可以要標番次尾會，追一次落後，點知追到而家都追唔到，所謂改革冇進展，睇唔到基本因素改善嘅誘因，根本搵個令人信服炒上嘅理由都做唔到。
歐債危機過後，因為錢多關係，炒股唔炒市炒咗接近三年，港股炒到冇嘢好炒。近期最強嘅大折讓H股同埋殼股，都唔係靠基本因素炒上。市場好選擇太少，投資者連角逐興趣都冇埋。
環球錢太多嘅局面，好多人話隨住美國退市而退潮，事實上唔會咁快，或許仲要維持幾年，原因係全個地球根本承受唔住資金唔氾濫嘅日子，冇卡可碌一定覺得想死，所以即使美國退曬市後，如果有新危機發生，美國一樣會出多一次新QE。至於中港股，每次就要等大跌市先有新機會。
晉佳
本欄逢周三刊登
晉佳
智取大市 - 晉佳 舊文