金融High Tea 2014年6月25日
手機股又有炒作
2014年06月25日
恒指大跌一日後，反彈唔算太有力，六月仲有唔夠一個星期就過去，互惠基金經理取態維穩，無乜事話最好梗係可以靚靚仔仔埋半年結啦，但同一時間又唔想自己郁手做太多，於是就出現個市浮浮沉沉，游自由式的狀態。但互惠基金經理維穩的心態能否如願，都要睇睇炒作的大戶在月底點部署喎。
成交淡靜之餘，期指呢兩日開始有轉倉活動，大市收報22880點，漲75點，成交回落至440億元，唔見到有好大回升動力。
面對近排呢類市況，有中環茶友大喊悶死人。其實，每年總有日子係考驗投資者耐性的時候。最近世界盃賭到開巷，隔兩日就睇到有人買波輸到仆，好多人睇到呢類新聞，都會話小注怡情，做乜賭咁大呢？
市場呢兩日興炒手機股，酷派(2369) 發盈喜，預計首五個月純利大增，公司話盈利大增主要由於今年智能手機銷售較去年同期大幅所致。
早前已有消息話5月份酷派TD-LTE 4G智能手機市佔率已超過兩成，成為內地4G市場一哥。昨日在盈喜後酷派股價飆13.3%，收報2.04元，仲帶動其他手機股份。
酷派年頭炒完插落尋底，一拆二後漸回穩。周一大市跌佢又插，跟手公司急不及待發盈喜，只能夠解讀為公司管理層唔想股價跌喎。估計未來有大行幫佢再出報告。
另一隻炒相同概念的股份係富智康(2038) 。內地手機生產商冒起，在內地市場已成功壓倒外國品牌，以代工生產為主的富智康母公司鴻海，面對呢個大潮流都諗緊點轉型，據報鴻海家已準備同美國品牌合作推出手機，而且仲係think big，想話同小米對撼，聲明產品係價錢同性能都要砌低對手。
手機股輪炒富智康
鴻海同小米拗手瓜勝負未知，但公司對於營運品牌會否影響佢的代工生意就好小心，強調主要係同美國品牌合作。
做品牌同做代工生產，基本上係兩門生意，自營品牌要投資好大係研發同推廣，係高風險高回報的生意，賺的係風險錢；而代工主要係搞管理生產，賺的係心機錢。而家母公司密謀食大茶飯，仍然專注做生產的富智康就發盈喜，料截至6月底止半年純利將適度高於去年同期，主要歸因於毛利率改善，及對成本嚴格控制，去年上半年溢利淨額為1723.5萬美元，喺呢個消息再加埋傳佢幫蘋果生產新款手機，公司股價彈升8%，報收5元。睇番過去一個月，富智康股價由4元水平一直殺上嚟，家好消息公佈，估計未來業績應該OK，因為累升唔少，可能先唞唞氣都唔奇。
天鴿有奇虎撐場
近排日日有招股活動，今日輪到內地城市軌道交通設計及工程公司北京城建(1599) 公佈招股詳情，招股價介乎2.75至3.3元，入場費3333.26元。
另一隻社交視頻平台天鴿互動(1980) 同時啟動上市，招股價介乎4.5元至5.3元，集資最多16.1億元，入場費5353.42元。奇虎360及劉央旗下的西京投資等10個基礎投資者，合共認購總額6.19億元股份。
係呢基礎投資者中，以做防毒軟件起家的奇虎係內地同美國市場有一定的知名度，創辦人周鴻禕做生意的策略進取，奇虎仲贏得中國最受爭議網絡公司的稱號。
陸羽仁
金融High Tea 舊文