中環在線：鏞記第三代開店
平民價賣燒鵝
■黃群生幫鏞記燒咗超過廿年燒鵝，指過檔工作更開心。李潤芳攝
燒鵝老字號鏞記經歷爭產風波後，第三代各自發展。已故嘅第二代掌舵人甘健成，佢二仔甘崇轅(Hardy)搵來鏞記老師傅坐鎮，喺灣仔新開「甘牌燒鵝」，新舖噚日試業。Hardy明顯唔想跟鏞記比較，講明各有各做，想有自己風格，會用適中價錢，午市吸寫字樓客，晚市做街坊生意。
午市套餐最平$62
甘牌燒鵝地方唔算大，一層地舖只有10張枱，驟眼睇，跟普通燒味店差唔多，只係裝修雅緻得多，門口招牌仲用紅紙遮住，7月3日先正式開業，噚日午市、晚市都座無虛席，主要係有唔少老朋友撐場。
根據餐牌，午市一個包小食、燒味飯嘅堂食套餐最平都係62元幾實惠，全隻燒鵝468元，半隻238元，比鏞記一隻燒鵝500元平。
本身都會親自入廚房嘅Hardy，唔肯比較自家燒鵝質素跟鏞記有乜分別，但佢講嘅「自己風格」，就係要用細舖特點令做嘢連貫啲，「廚房燒完即刻拎出嚟賣，新鮮啲又易控制品質，畀番多啲空間自己」。佢指「燒味呢啲嘢，做法都係大同小異，但食材調味就會揀好嘅」。
■甘崇轅用3、4個月就籌備好呢間新店。 
■甘牌燒鵝走街坊路線，裝潢平實，門外招牌蓋上紅紙，準備下周開幕才撕開。 
■鏞記第三代甘崇轅開的燒味店名為「甘牌燒鵝」。 鏞記老師傅坐鎮
至於16歲已經喺鏞記打工嘅燒味師傅黃群生，亦都話細舖歸屬感大，過檔「做得開心啲」。
咁啱，Hardy大哥甘崇軒開嘅「甘飯館」廣東小炒，亦喺噚日試業。Hardy解釋，由於兩兄弟有自己諗法，所以不如各有各搞，「佢嗰種係可以坐耐啲傾多啲偈嘅，我就要快少少步伐嘅」。的確，新一代有自己嘅諗法，各自各精采都未定！
李華華
mailto:LiWaWa@AppleDaily.com
【我撐公投】網頁:
http://622popvote.appledaily.com
LiWaWa@AppleDaily.com
中環在線 - 李華華 舊文