陸羽仁 BLOG 2014年6月25日
老外老細５
2014/6/25 上午 10:16:58
網誌分類: 經濟
叫大家唔好賭波絕對無錯。西班牙出完局後，意大利昨晚又被絕殺，落注真係多多唔夠輸也。
美股無厘頭一插。美國經濟數據利好，美股早段仲好地地。6月消費者信心資料增幅超預期，5月新屋銷售漲幅也強於預期，反映經濟正在穩定地復甦，又進一步證明美國年初經濟唔得，主要係受到嚴冬拖累，受利好經濟刺激，美股早段造好，標普500指數再創歷史新高。
午後就插，原因難解。表面原因係市場傳出伊拉克戰亂及烏克蘭的緊張局勢升溫，再加上費城聯儲行長普羅索(Charles Plosser) 話，由於預期今年底，美國失業率將降至5.8%，而各界對持續低通脹的擔心，亦因為近期的經濟數據都好過預期而有所緩解。又話「美國經濟發展，正以快過一般人想像的速度，接近聯儲局的預設的目標」所以，預計聯儲局會在2014年第三季加息。呢個時間，明顯比市場目前預期的明年年中前早好多。普羅索補充，加息或者減息，並不是依據日曆來確定的，是根據經濟數據而定的。佢認為有必要調整有關的溝通方式，目前的政策聲明，可能過於被動。
但話中東局勢升溫，伊拉克反對武裝佔領埋最大的煉油廠，但油價卻回落，令能源股如EOG Resources沽壓嚴重，這一陣子能源板塊係領升股，昨日就變領跌股，跌市成交仲大升，顯示好多人沽貨。結果杜指跌119點至16818點；標普500指數挫13點，收報1950點；納指跌18點，造4350點。
杜指昨日單日跌幅係5月20日來最大。不過，比起近期的進賬，仍屬溫和。另外聯儲局的普羅索係著名的大鷹派，佢的收水言論，市場其實早已心中有數，股市只係借勢下調。券商Miller Tabak股市策略師梅利(Matt Maley) 話，股市仍然處於接近歷史最高的水準，而GDP與企業盈利增長卻有些疲軟，投資者當然有點緊張。不過，普遍的人仍然信心爆炸，唔怕股市會大幅轉向，只係擔心短期可能出現回調。
我就話美股升咗咁多，累積太多好倉，只要購買動力一減弱，有人沽一種股票，其他人唔理三七廿一都會走先。美股升咗咁耐，小心佢要展開一小浪調整。
再講吓辦公室政治故仔。由於同財經無關，無興趣的朋友可以不睇了。唔記得講講，為保障我呢個朋友的私隱，劇中人名及細節都經過一定的扭曲，佢話廢事俾舊同事睇到以為佢想寸人就唔好。
上文講到我朋友(不如叫佢號Peter方便啲)食完David餐飯，雖然明知David係玩手段扮吓friend，但人真係咁，都幾受，未至一飯泯恩仇，但都放低咗上間公司俾人玩走的心結，唔再記得對David的不滿，潛心新工作。(所以有時門面工夫要做)
Peter的新老細係歐洲老外(真係老外)，比較大紋大路，可能由於佢根本唔擔心有人挑戰到佢，所以和下屬關係好直接，呢種作風好啱Peter的路數，但佢都學精咗啦，以後有功老細領，有鑊自己孭。Peter做番私人銀行部門，做做吓就升咗上去揸飛位啦。有一次總行老細彈咗間剛來港落腳想去中國開業的歐洲公司俾香港做，個客來香港，點知Peter個老外老細預咗放假無去見客，個客見到唔係香港Number 1招呼佢，就話「下次再約」，根本唔肯見，轉個頭俾另一間歐資行搶咗。
Peter知道雖然生意唔係咁大，但總行老細一定詐型，馬上寫咗封電郵俾自己上司，孭曬成件事上身，自插三刀，話自己辦事不力，未來點都要追番個客返來咁話。Peter深知上司一定會射佢封電郵俾總行老細平息件事，果然真係咁樣，但總行老細見下便有人自首，講咗句「下次加油」就算數。
Peter的老外老細可能在歐洲見慣懶人，來到香港見到Peter咁勤力的下屬，本來已好開心，唔使自己做嘛。如今見識到傳說中的中國人「義氣」，好似見到再世關雲長咁樣，明明老細錯下屬都孭上身，真係佩服到五體投地。以為就對Peter青眼有加，令佢一級級咁上。我以後同Peter飲嘢，都叫佢「關雲長」。
相反「關雲長」個前老細David就如坐過山車咁，在2007年前美資行急促擴張，David亦紥職睇多幾個部門。2008年一插，2009年急彈，David抹一把汗以為自己唔死得之際，到2010年開始，美資行裁員潮一浪浪嚟，David殺完一批人後，第二批就輪到自己，當日老細叫佢入房，佢都唔信自己有份，佢一向係公司內的High-flyer(高升者)，發夢有一天回美國紐約揸旗，那想到裁員裁到自己。其實每次裁員都有銀碼要達成，今次落來的配額大，唔殺佢唔夠數。平時公司講好多照顧員工、工作生活平衡之類的說話，一到裁員就乜都無意思啦。
David就咁遊咗半年，係住開公司租俾佢的紅山半島，而家大屋搬細屋，到處打鑼咁搵工。有一日Peter老細打個電話俾佢，話收到封求職信，好似係以前公司，唔知你識唔識，Peter都估到係David，David想做的位置係私人銀行部門的主管，呢個亦係佢管的部門之一，Peter心諗「無咁戲劇性呀嘛，老細變下屬? David都知我在這裏，點解唔打個電話俾我?」但心念一轉，答老細話「呢個叻人嚟架，等我見見佢。」咁就令一個世界輪流轉的故事成真了。
陸羽仁
回應(2) 我想回應
陸羽仁 BLOG 舊文