魚樂無窮：富智康破位見六字頭
■童文欣任主席的富智康，筆者認為該股股價有力後來居上。資料圖片
積金局就推出核心基金進行諮詢，希望新基金每年管理費可低於0.75%。強迫金收費貴人所皆知，將回報蠶食，以為今次做番件好事，點知要到2016年先實施，一個project要搞足兩年，喺積金局做嘢應該幾嘆。
三大賣點夠煞食
手機設備股近期大翻身，比亞迪電子(285)近八個交易日升足七日，霸氣十足，同業富智康(2038)亦急起直追，配合三大賣點，絕對有力後來居上。
賣點一︰定單勁。據報為應付iPhone6生產需求，富智康母公司鴻海喺內地招聘逾10萬人，貨量之大難以想像。公司同為神機小米最大代工商之一，小米出貨量目標今年已上調至5,000萬部，富智康盈利睇高一線。
賣點二︰業績正。去年成功扭虧為盈之餘，下半年盈利更較上半年爆升逾兩倍，配合上述利好因素，今年毫無疑問會大豐收，盈喜消息相信會一浪接一浪，彭博綜合券商預測，今年市盈率將由現時嘅62倍降至23倍，意味今年盈利增長近兩倍！
賣點三︰走勢靚。富智康由5月初展開強勁升浪，噚日大陽燭突破3月高位，強勢畢呈，四條平均線順序排列，周線圖更出現圓底走勢，正！首站目標先睇6元！
兩戰兩勝嘅阿根廷今晚將迎戰尼日利亞，因前者篤定出線，或會派副選上陣，相反尼日利亞要多取一分才能晉級，戰意必高昂。此消彼長下尼日利亞受讓一球有1.88倍具值博率，喜歡扒冷更可吼和波，有3.5倍。
唐牛
https://www.facebook.com/tongcow88
唐牛
魚樂無窮 - 唐牛 舊文