智取大市：港股六絕機會大
■陳昌任主席的珠江鋼管受惠於中俄天然氣協議，股價上升合理。資料圖片
每次股市長線好轉，一定伴隨成交逐漸回升。交投弱雞嘅乾彈，不可能長期持續。
回顧今年過咗5個月，恒指就已經出現「三高三低」。第一個反彈浪頂喺2月底，單日成交最多嗰日達到770億元。至於第二個浪頂有滬港通關照，令單日成交最多達到1,069億元。至於今次，未知而家係咪浪頂，上個星期五有MSCI指數換馬，單日成交去到754億元，已經係反彈浪以嚟最多，力度實在太弱，未見長線轉勢跡象。
再睇埋周線圖，呢一轉反彈浪嘅每周成交，亦明顯不及之前兩個反彈浪。最麻煩嘅係，拆開上個星期五個成交日睇，星期三至五嘅成交比較多，但並唔係大成交炒上，而係連續三日先搶高然後派貨。噚日因為有內地PMI數據同埋阿爺提出「定向降準」消息刺激，先至能夠再高開破頂，但早市曾經見淡友略為發力小試牛刀。港股高位承接力不足，淡友亦開始發力，指數喺6月似向下多過向上。至於股份方面，近期走勢比較好，除咗有本地地產股同埋內銀股之外，亦有天然氣設備股，原因係中俄兩國接近傾好天然氣協議。中俄兩國傾能源合作已經傾咗廿年，礙於政局、能源市場發展，一直傾唔掂數，障礙有兩項，第一係邊方面負責修建管道，第二係價格問題。喺2012，中俄曾經初步傾過由俄方參股中國天然氣管道建設，中方參與俄上遊天然氣開發，但最終方案係咪咁樣，協議一日未簽訂，一日都未知。
如果睇股價反應，協議暫時睇唔多似係咁，如果中方參與上遊天然氣開發，從事天然氣開採、同中石油關係密切嘅安東油田(3337)應受惠，但股價相比生產管道嘅珠江鋼管(1938)同天大石油管材(839)更弱。
炒油氣設備珠管勝天大
講開珠江鋼管同天大管材，兩隻股份業務範圍完全唔同，珠江鋼管主攻石油同埋天然氣運輸管道，天大管材只係做油管。後者爆升，斷估係炒錯隔離，同喺深圳A股上市嘅浙江世寶(1057)差唔多。
至於珠江鋼管方面，理論上可以受惠中俄協議，但以國外慣例，通常係由傳統鋼鐵企業承接生產天然氣管道嘅生意，珠江鋼管單純做管道生產，競爭優勢難以及得上有埋上遊業務嘅傳統鋼企，利潤率亦經常出現大幅波動，所以多年來股價走勢唔算太靚仔，但係中俄天然氣協議始終能夠帶來新財路，股價上升都係合理。珠江鋼管市賬率0.62倍，為歷史低位，作為競爭力一般嘅工業股，估值合理，好消息當前，可小注吸納，中線睇3.4元，跌破5月22日開市價2.55元止蝕。至於天大管材，短炒就要較小心。
晉佳
本欄逢周三刊登
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp
晉佳
智取大市 - 晉佳 舊文