金融High Tea 2014年7月25日
繼續坐車
2014年07月25日
港股跟住內地走，匯豐中國PMI升幅大過預期，更是連續四個月回升，兼且人行再暫停正回購操作，中港股市續起舞，內地滬深兩市升逾1%，上證指數重返2100重要阻力位，港股動力維持，恒生指數更連升三日，收市再升169點，上破去年12月高位24111點，創逾3年高位收市，全日成交超過800億元，即月恒指夜期開報24160，與日間期貨收市升9點，與恒指收市價高水19點。由於指數破咗位，照成交睇，個市有機會再炒吓落後。
個市借住內地生產數據造好，但內地經濟其實唔係咁好，廣東省政府網站正式印發《關於進一步加強全省貿促工作的通知》，力谷廣東省市場面向全世界。
內地ETF全線上揚
今次催谷提出目標在2018年，於境外設立20個廣東境外經貿代表處，再加20個廣東國際商會、20個雙邊企業家理事會，確保駐外經貿代表處，能覆蓋世界主要目標市場和新興及周邊國家。
經濟唔好要催谷，唔一定影響股民炒股興趣。內地借住匯豐中國PMI預覽值創出18個月新高，滬深再升超過1%，上證指數連升三日，並且升穿2100關，創今年4月以來新高。本港上市的內地A股ETF上揚，安碩A50中國(2823) 升2.7%，南方A50(2822) 漲2.8%。
升勢仍係集中大股
呢輪大市連升，升勢仲係相對集中，未出現雞犬皆升現象。藍籌股升得多係中移動(941) ，佢由低位六十幾元爆上，反彈幅度接近三成，以一隻市值一萬七千億元的巨股嚟講，確係厲害。相比之下，港交所(388) 升勢無咁搶眼，但佢陰陰升，升啲升啲創出近年新高。呢兩隻巨股有啲相似，就係核心業務麻麻，靠嘅係概念炒上。
中移動喺網企狙擊下，首季業績倒退，3月中急挫到63.65元低位，真係嚇到小股東面都青，呢一陣佢急升上嚟，主要係炒4G上客快，同埋會和其他電訊公司合組鐵塔公司搞網絡基建，4G效益有幾大家仲要觀望吓，但鐵塔公司合資100億元，咁嘅規模的投資相對一家萬億企業嚟講有幾大作用呢？所以中環茶友話，買佢最實際可能仲係有成3.9厘息。升市炒股只能講順勢做嘢，不過要留意係佢同一年高位89.2元已經愈嚟愈近，累積回吐壓力不斷增加。
至於隻港交所今年升幅都有三成，唔同嘅係佢無大跌過，走勢反覆向上。從基本講，港交所今年多咗新股生意，但最關鍵係佢買咗倫敦金屬交易所，呢個投資短期好大機會拖低回報，所以港交所未來高增長機會唔大，所以買佢係買內地開放股市的概念，佢嘅升勢來得比較平均，坐順風車無咁易暈車浪。
陸羽仁
金融High Tea 舊文