金融High Tea 2014年8月29日
追貨兩難題
2014年08月29日
市場昨日最大消息，當然係壹傳媒(282) 股份停牌。公司大股東黎智英晨早被廉署調查，壹傳媒喺市場交投唔係咁活躍，佢停牌對投資者影響唔大。今次事件係有個名為「壹傳媒股東」嘅深喉喺網上爆料，涉及黎智英向議員捐款同好多私人錢銀有關嘅資料。
爆料股民聲稱不滿佢上市公司生意蝕錢，自己就喺台灣、緬甸大做私幫生意，故此要爆陰毒，佢呢個說法令好多人都半信半疑。不過講番轉頭，壹傳媒上市多年，喺二千年科網股時代，曾經炒到20元樓上(佢曾經合股)，之後大插水。最近佢股價好番啲，有時上番1元樓上，但都係同佢當年借殼嘅價錢差唔多，所以買咗呢隻股嘅股民，十個有九點九個坐緊艇，?家突然再爆負面消息，對投資信心點都有影響。如果爆料者真係公司股東，快意恩仇之餘，荷包暫時就要畀小小代價嘞！
兩萬五千點阻力大
個市好明顯睇到結算角力，人行再度收水，進行100億元人民幣正回購，內地股市受壓，上證指數失2200關支持，港股期指結算日「彈完即散」，午後曾瀉239點，收市雖跌不足兩百點，失守20天線(24816點)收市，證明個市去到六年高位，兩萬五千點呢個位真係有阻力㗎。
恒生指數全日收報24741點，跌177點；國企指數收報10931點，跌142點，成交增加至804億元。
碧桂園集資股價即回
內地樓盤銷售放慢，好多公司都要諗計改善資金流，以捱過寒冬。碧桂園(2007) 大折讓供股，以15供1方式集資，供股價每股2.5元，較之前收市價3.62元大幅折讓約31%，集資淨額不少於31.5億元，所得資金將用於現有債務再融資，以及一般營運用途，供股聯席包銷商為高盛和摩通。
供股折讓咁大，小股東好難唔供，消息公佈後，股價應聲下挫7%，之後升幅收窄番啲，收報3.44元，跌咗4.9%。在較旺的市道買股係兩難題，市況一回走唔切就有問題，去年底買碧桂園就是如此。現時也是這種市道，唔買，又怕個市再升無貨眼光光。買，一回頭跌到10%時，真係要考慮斬唔斬。
至於受累上海項目拆遷緩慢嘅瑞安房地產(272) 近年業績差強人意，向鷹君(041) 出售2家酒店，總作價27億元。公司表示，酒店原本就非核心業務，且若干酒店往績欠佳，所以套現資金投資其他業務，以改善淨負債率。
瑞安揸弗人羅康瑞同鷹君揸弗人羅嘉瑞係兩兄弟，但兩間公司獨立運作。瑞房上半年合約銷售額為28.19億元，按年跌56%，有需要加強資金回籠。早前鷹君用茶渣價投咗塊科學園地皮，今次相信又係諗住執平貨。鷹君喺房託熱潮時及時分拆咗酒店出嚟套現，?家大把子彈執嘢，如果兩地樓市有，鷹君就肥仔嘞。不過，佢一向股價慢熱，加上項目無咁快提供回報，投資者暫時都唔使咁急入貨。
陸羽仁
金融High Tea 舊文