金融High Tea 2014年9月1日
銀樓互動
2014年09月01日
全球股市經過近月攀升，上月尾開始有啲疲態，美股同內地股市周末都係反覆上落，特別係內地股市，受到新一批上市股份影響，A股有少少壓力。香港情況比較特別，除了經濟因素，人大常委昨日公佈普選特首的框架，一如預期採取高門檻入閘要求，同泛民主派嘅要求相差甚遠。佔中人士反應暫時克制，無發動大型抗爭活動，不過，喺九月上半月，仲有幾日假期，包括中秋翌日，呢啲日子會唔會有大型集會，過程中會唔會有激進行動，或者擦槍走火，家無人敢擔保。現時佔中形勢比想像中溫和，對股市未睇到有乜大衝擊，但點都係多咗個敏感因素。
俄國趨緊股匯散咗
要留意嘅係呢幾日全球地緣政治的變化，英國將恐襲警示提高到第二級，以反映伊斯蘭國武裝份子的威脅，同一時間烏克蘭局勢再度緊張。有傳俄國軍隊闖入烏國後，市場擔心西方會加強制裁俄羅斯，搞到俄國股匯齊跌，美股開市都受消息影響開市偏軟，之後反覆向上，標指仲創新高收市。蘋果喺推出新智能手機消息帶動下，股價亦再創新高。而港股喺美國掛牌的預託證券，就受美股低開影響略為偏軟。
俄國同西方關係緊張，一度令資金由歐洲流入亞洲，間接利好埋港股，呢個情況已經出現一段時期，資金流入有漸漸放慢跡象，新一輪緊張後，唔知會唔會再刺激走資，港匯表現相信會有參考價值。
8月份唔少公司公佈業績，幾個行業嘅國企股派咗成績表，其中一個最令人關注嘅類別係內銀股，皆因內銀中有唔少權重股份，而且唔少投資者揸住佢哋嘅股份，如果佢唔肯郁，國企指數都好難大幅炒上。
隨着工商銀行(1398) 宣佈埋業績，大型國企銀行盈利表現基本上已有眉目，整體嚟講，內銀股大間比細間表現好，而且大概保持到增長，粗略用一成為界，盈利增加超過一成者算係表現較佳。市場焦點則放喺淨息差變化同貸款資產質素，仲有就係資本比率夠唔夠。
基本上內銀淨息差變化比較平穩，反映市場最擔心利率自由化嘅衝擊仲未明顯，情況比估計穩定；與此同時，資產質素就有少少變差咗，同埋發展趨勢仲未明朗。由於撥備增加，令個別銀行資本率有少少壓力，需要在下半年透過發行優先股等途徑加強資本實力。
其實，內銀股估值甚低，多少係反映咗市場嘅憂慮，今次公佈出來的業績有少少差，但又可以話唔係預期咁差，故此大部份股價都係跟隨大市上落，唔算有太特別反應。
唔同銀行之間，工行中期多賺7%至1481億元人民幣，符合預期，較其他幾隻內銀股，算得到較好的大行評級。麥格理認為，工行業績平穩，會刺激短期的投資氣氛，認為工行擁有較高的淨息差，以及穩定的資產質素，可以支持工行7%之回報率，維持「跑贏大市」評級，目標價5.44元。摩根大通就指，工行淨息差改善較其他同業好，資產質素變差的速度較同業為慢，維持「增持」評級，目標價6.2元不變。
內銀業績麻麻唔算太差
另一隻中行(3988) 上半年純利按年升11%，淨息差按年升3點子，存款及貸款增長均勝預期，資本充足比率及資產質素則較弱。大行里昂就認為，踏入下半年，預計信貸風險會繼續增加，淨息差會繼續受壓。里昂又指，中行的不良貸款比率升6點子，至1.02%，符合預期，但不良貸款餘額則高於預期，上半年新增不良貸款126億元人民幣，較去年升61%，期內有90億元人民幣撇帳，新形成的不良貸款增速較市場預期快，逾期貸款比率升至1.35%，為維持可吸收損失，信貸成本上升30點子。里昂相信淨息差收窄將會是市場趨勢，尤其是政府要求金融機構支持實體經濟，保持借貸成本為低水平。
先前我對中行稍稍看好，主要是淨息差有改善，現在出嚟見佢又跌番少少。呢個情況會唔會係管理層留定啲力呢，因為成績表都有一成以上增長，未必需要谷到咁盡喎。
內銀股家較惹關注係資產質素會否繼續變壞，呢樣同中央政策相當有關係。對於下半年經濟情況，國家發改委主任徐紹史認為，當前經濟企穩的基礎還不牢固，經濟運行穩中有憂，下半年要在保持宏觀政策基本取向穩定的同時，更加注重定向調控、預調微調。下半年將加強預期引導，促進房地產市場平穩健康發展；實施緩解企業融資成本高的各項政策，進一步健全金融機構風險處置機制。
佢仲話，要深化金融體制改革，積極推進試點民營銀行籌建工作，有序推進利率市場化改革，大力發展多層次資本市場，開展信貸資產證券化試點。如果中央意識到經濟前景唔係咁平穩，增加維持增長的措施，對銀行經營都會有穩定作用。
貸款質素受樓市左右
內銀股前景另一個取決因素，係內地樓市走向。家市場對內銀其中一個憂慮，係內地樓市持續低迷，咁會產生兩個效果，一個係過去內地好依賴房地產刺激需求，維持景氣，基建投資同房地產基本上係兩個保證增長的火車頭。由於基建能夠維持力度已經唔易，再加大肯定好有難度，喺咁嘅情況下，若無咗房地產去支撐需求，咁搵乜去維持經濟嘅熱度呢？市場因此估計，中央喺適當時間，都會放鬆番樓市的緊箍咒。
另一個問題係市場擔心樓市轉差，會影響銀行資產質素。早前，內地媒體起哄，話有地方出現斷供情況，令到財金官員都緊張起上嚟，急急發表維穩言論，撫平市場情緒。從來樓市同銀行體系係相連互動，美國的金融海嘯，起因就是銀行過度放貸，催生咗次按問題；當樓市泡沫爆破，業主掟番鎖匙畀銀行，就觸發金融體系不穩。
過去內地樓市打極唔死，主要係因為在四萬億救市大計下，大量熱錢透過銀行流入房地產市場，呢個情況喺過去一年剛好扭轉，銀行唔再大量貸款畀業主，甚至傳出有買家無法上會，喺水喉慢慢扭緊後，房地產市場唔再係不死鳥，所以呢次調整嘅成因唔在限購令或其他行政措施，而係水源不繼造成。有分析認為，現時二三線城市取消限購令呢啲行政干預，對刺激市場根本起唔到明顯作用，真正可以谷番起個市的方法，仍然係要銀行放寬按揭貸款，呢樣嘢亦會左右內銀股表現。
碧桂園抽水無蝕底
內地房地產幾時會轉角，暫時仲要觀察。傳統上，未來「金九銀十」兩個月係內房賣樓的關鍵，賣樓嘅情況成為市場炒作內房以至內銀的重要指標。值得留意的是，喺樓盤搶客戰開始之前，大型內房商碧桂園(2007) 率先宣佈，以折讓價供股集資30幾億元。30幾億元睇落唔算多，不過，集資所得全部係現金，當資金緊張時特別好使好用，從呢個時間做呢個動作，反映有房企唔想等賣樓結果，先行增加手頭銀彈。
經過咗過去咁多年發展經驗，上得市嘅內房商都識得運用不同渠道融資，令佢哋整體嘅財政實力增強不少，故此過去政府不斷進行調控，基本上都無內房商正式爆煲，反映大公司的財政實力都有番咁上吓，可以頂得唔少風浪。但係，對佢哋嚟講，「金九銀十」前先抽水，若然賣樓賣得好，雖然新股發行價可能定得平咗，但公司多咗現金用嚟買地起樓，唔係一件壞事，若然市況未有好轉，手頭多咗筆資金在手，個心就會定好多，無論點計都制得過，故此唔排除會有其他內房股會出手抽吓水。如果抽水公司多咗，即係股票供應會增加，有心想買內房股的投資者，就可以等吓機會撈平貨。
陸羽仁
金融High Tea 舊文