陸羽仁 BLOG 2014年10月15日
通縮市
2014/10/15 9:26:49
網誌分類: 經濟
美股連插三日後，昨日朝早反彈，係威係勢，杜指最高升過140點，但午後又再腳軟，打回原型，杜指收市倒跌6點，收市報16315點；標普500指數靠穩，微升3點收場，收1878點，算係終束了三日跌勢；納指表現較好，升14點至4227點。
美股昨日稍為喘定，做個全年總結，比較去去年底，美股升幅已經差唔多化為烏有，標普500指數算係企得最硬，仍有2%進賬，納指有1.1%，而杜指已經見紅，倒跌1.6%。年中高位冇食糊，依家可能得個吉，甚至輸凸。
美股唔得，債券又唔錯喎。美國30年期國債券息率昨日跌穿3厘，係2013年5月以來首次，而美國10年期國債息率低見2.2厘，真係低處未算低。Bianco Research總裁James Bianco昨日收市後接受CNBC訪問時表示，債券升勢仍會持續，債息還會向下，原因係「美國經濟雖然已經暗淡無光咗幾年，但估計情況仍會持續。美企賺錢又無乜睇頭，通脹率又低，歐洲經濟唔得，更難搵食，所以資金會回流到美國。這是推動債息率上升的惟一原因，理論上也會同時推高通脹率，但現實上卻沒有。」
Bianco指出，事實上，債券係今年最佳嘅投資，美國30年期債券的今年回報率，便有23%，由於基本因素還在，情況仍會繼續。
我估債息係咁跌的原因係由於美國經濟復甦進程，一步三回頭，另外投資者擔心以歐洲為首的全球經濟放慢，將資金投入比較安全嘅債券市場避險。這是一種通縮市，本來以為美國快將加息會帶來通脹市令債息向上，怎料歐洲和中國放慢先見一個通縮市，通縮市銀紙升值，利息向下，這個通縮市先由德國爆發出來，而家德國10年期債息跌到0.9厘以下，兩個月前剛穿1厘，而家又穿埋0.9厘，德國債息跌得咁快，拖住美國債息下行。但資金仍流出歐洲，流入美國，所以美元強勢。本來歐洲央行大規模量寛係阻斷通脹的最佳方法，但德國唔同意，意見分歧更令市場擔心，資金流走。
標普50指數之所以頂得住，冇見紅收場，全賴汽車及航空股造好。Douglas C. Lane & Associates嘅總裁Sarat Sethi昨日在CNBC嘅Half Time Report上指出，美股連跌三日，汽車股及航空股跌到七個一皮，建議投資者可以買入。Sethi認為這些股份，在其基礎因素唔係咁差嘅情況下，股價卻勁跌三成甚至四成。尤其係航空股，乘客量沒有明顯減少，而燃油價格近期又下跌了不少，比起5年前，紐約原油每桶120美元，近日已經跌到近80美元水平，最新報82.3美元，燃料成本大跌超過30%！
由於原油供應大增，但需求大跌，估計油價仍有下跌空間。所以航空公司的賺錢能力只會有升無減，而航空股卻沽壓沉重，呢種情況唔係好合理。佢又補充，投資者或者擔心伊波拉病毒蔓延，無人搭飛機，建議買美國航空、聯合航空或者達美航空，以上的航空公司以美國為基地，主要飛美洲內陸，不太受伊波拉病毒蔓延影響。美國航空昨日勁升超過10%，而聯合航空及達美航空亦齊漲超過6%。
等個市插深啲時，香港上市的航空股都可以吼一吼。
陸羽仁
回應(7) 我想回應
陸羽仁 BLOG 舊文