金融High Tea 2014年10月15日
東風唔易吹
2014年10月15日
股市近排有點顧得頭來腳反筋的味道，一係本地佔中搞到唔知點；一係美股受經濟不明朗影響腳軟軟。前晚美股軟蹄症又發作，跌咗超過兩百點，但上午警察拆路障開番金鐘道，中環佬好雀躍，一度回升200幾點，但睇真啲都唔係全面清場，大市欠缺火車頭，升勢無法維持，下午就回軟跌95點收場。
油價近日持續下跌，令市場擔心發達國家景氣能否持續，美股再度調整，跌至近萬六點水平。國際組織早前調低全球增長預測，大家擔心歐洲經濟持續放緩，日本靠貶值推動內需，對全球增長根本無幫助，最後連美國都會因為收水同加息，搞到復甦斷纜，所以杜指喺萬七點樓上，就有回調壓力。
歐盟統計局昨日公佈，經季節調整後，歐羅區8月工業生產按月轉跌1.8%，超出市場預期轉跌1.6%，7月略下修至轉升0.9%；按年也轉跌1.9%，呢啲數據都顯示當地經濟轉弱，成為港股反彈乏力理由。
升得多可以沽
佔中方面，昨日警方移除金鐘障礙物，一度被市場視為「利好」消息，個市上午反彈，都係睇住金鐘道拆路障所致，不過，金鐘大路未通，旺角亦未有乜進展，呢個區龍蛇混雜，所以就算有進展，對風波解決都不能過早樂觀。喺消息變化唔大之下，恒生指數收報23047點，跌95點；國企指數收報10254點，跌30點，成交縮減至625億元。
市場佔領運動同滬港通掛鈎，家情況緩和咗，市場就估緊未來兩日，滬港通會唔會有聲氣，因為要喺今個月開通的話，今個星期應該係「死線」。正喺大家眼望望之際，中州證券(1375) 就公佈，獲上海證券交易所發出通知，表示同意開通滬港股票市場互聯互通機制下A股交易單元的港股通業務交易權限，仲話公司將按上交所相關規定進行港股通業務交易權限開通後的各項準備工作。
滬港通萬事俱備，只待東風，但陸羽仁繼續做淡友，認為滬港通唔可以按期開車，大家要有少少心理準備，所以即市策略係咁，好似昨日呢啲升市，升得多不妨沽吓，反而未來可能有滬港通壞消息跟尾，但插得深又唔好追沽得太狼，因為街頭的政治訊息日日變。
港鐵(066) 大圍站項目招標，由於將商場分拆，吸引咗唔少財團入標，結果由新世界發展(017) 成功奪標。新世界曾經投得沙田車公廟站，今次競投大圍站，可算是食髓知味。大圍站過去發展項目唔少由長實(001) 投得，今次長實話都有出手，仲話投標價唔低，似乎就新世界出手仲勇啲。
大圍站曾經流過標，有人話係商場部份投資比較大，影響咗競投意欲。不過，中標的新世界主席純官就話，自己兩個方案都有入標，最後港鐵選咗個不連商場的方案。新世界發展項目的住宅部份，作價28.56億元，另外，港鐵將為發展項目的商場提供75億元資金，項目總地價逾103億元，共提供2900個單位。純官估計，港鐵係想保留番個商場自己收租。大圍商場同新城市廣場及又一城兩大商場只係差一個站。
港鐵變佔領受惠股？
年前又一城商場由太古集團賣咗俾新加坡財團，價值接近兩百億元，大圍站係馬鐵同東鐵交匯處，地利位置絕對唔會差過呢兩個商場，港鐵想留番好嘢畀自己亦唔出奇。有中環茶友笑言，呢排搞佔領運動，無論明星、富豪都用港鐵出入，連警察增援都話要搭港鐵，聽聞港鐵呢排載客量升咗兩成，佢變咗「佔領受惠股」有得升。
港鐵係半隻運輸股、半隻地產股，受車務收入上升支持，無受佔中影響咁大係事實，但佔領行動咁搞落去，香港變成輸家，照計大公司都無邊間有運行。家只係可以話，大圍站仲有人肯落標競投，港鐵公司仲想留番個商場慢慢收租，說明大財團仲未因為呢次事件，太過影響對本地長期投資信心，咁樣唔知算唔算係壞消息中的好消息。
陸羽仁
金融High Tea 舊文