金手指：再不問價追彩星
■忍者龜DVD聖誕期間熱賣。買得嘅家長，會唔會加幾美元買埋玩具呢？ 資料圖片
開始醒啦！上周孫柏文叫大家如果投資想學畢菲特，要眾人皆醉你獨醒。A股狂炒下就諗其他嘢。點知一周後，啲人開始醒啦！上周叫大家不問價追摩比（947），如果你聽話開市就喺1.51元不問價追，兩日後已見1.67元。
忍者龜仍受歡迎
大家都仲消化緊李嘉誠先生講嘅嘢，不過最有價值嘅嘢反而被市場忽略。要緊記，當市場同你嘅預測有嚴重出入時，而最終係你啱的話，就可贏大錢，尤其如果係大事。由2009年至今，貨幣政策主宰一切。今時今日，新聞對股價影響未必太重要，重要嘅係新聞點影響到貨幣政策。而李生喺記招最斬釘截鐵係：「美國今年加唔到息！」呢個貨幣預測係同全球市場預期為背！佢嘅預測絕對有根據，如果啱，即美經濟唔會好。喺市場冇預期嘅情況下，有好多能受惠嘅股票就要即刻買。
經濟唔好，貴價消費品需求會減，不過平價嘢就會比預期多嘅人買。所以今日叫大家再不問價追造忍者龜玩具嘅彩星玩具（869）。彩星玩具近半年係咁俾人沽，啲人覺得舊年忍者龜電影唔係好勁，今年又冇電影上，就沽到PE跌穿四倍，離譜到近乎殼股市值。有悲觀式嘅盈利跌幅，即只要盈利冇跌得咁多，隻嘢就會大升。
首先佢電視卡通收視亦保持強勢，花旗國娛樂行業雜誌年尾時直情話佢單show保個台。而且，睇Walmart網站有銷售排名，男仔兒童玩具平價類別，聖誕期間頭十隻最賣得嘅玩具中，有好幾隻都係彩星玩具造。點解咁好賣？其實忍者龜DVD喺舊年12月開售，成為喺2014年票房下開售最賣得嘅DVD。買得嘅家長，你話會唔會加幾美元買埋玩具呢？可能係咁，彩星玩具同期開始見底回升。
我知彩星玩具母公司曾經喺4元時減持。落到噚日1.64元呢個位，母公司可能諗點增持𠻹。最後其實最強買入訊號，係之前大鑼大鼓叫人買彩星玩具嘅梁心欣都唔再提，係時候再不問價追彩星玩具。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文