魚樂無窮--下一隻長和：會德豐
■吳光正家族掌控嘅會德豐，業務瓣數多，多元化程度拍得住和黃。 資料圖片
長和系歷史性重組，市場反應正面，長實（001）同和黃（013）開行turbo，齊齊炒高逾一成。最多人想知嘅係，而家究竟買長實定和黃呢？有人會從換股比率出發，用1換0.684呢條公式，計下買和黃定係長實抵。
老老實實，股價呢一秒同下一秒都唔同，好難有一個正統答案。所以，唐牛就用最簡單嘅思維答你︰沽和黃買長實！點解？唔會有碎股囉，講完！
重組釋放潛在價值，再反映在股價身上，向前望，藍籌重組勢必成為未來投資主旋律，搵定概念股買有著數。市面上最值博嘅係邊隻？會德豐（020）是也。
由吳光正家族掌控嘅會德豐，業務瓣數多，透過直接及間接持有九倉（004）、有線寬頻（1097）及海港企業（051），從事投資物業、發展物業、酒店、物流及通訊、媒體及娛樂業務，多元化程度拍得住和黃（013）。簡單計計數，會德豐市值817億銀，九倉市值1,848億銀，會德豐持有55.08%九倉股權，單計呢批持股，已值1,018億銀，較會德豐本身市值高出201億銀，會德豐被低估程度可想而知。係咁易追番呢條數，都有24%上升空間。
唔好忘記，吳光正已將帥印交畀兒子吳宗權，重組只係時間問題，雖然噚日已升7%，但市賬率0.5倍未夠，值博率依然好高。
唐牛
https://www.facebook.com/tongcow88
唐牛
魚樂無窮 - 唐牛 舊文