金融High Tea 2015年1月13日
千億大解放
2015年01月13日
長實(001) 主席李嘉誠果然係財技超級高手，佢一招垂直控股變橫向控股，釋放和黃(013) 折讓價值的招數一出，長、和兩隻股票昨日一開市即刻急升，差不多開市時已是最高峰，長、和兩隻股票市值合共膨脹咗1259億元，收市兩隻股夾埋市值都脹咗894億元，其中長實市值升咗426億元，和黃市值升咗468億元。陸羽仁計過數話佢哋重組會釋放千億市值，一日就已經到位，在香港收購合併重組上，相信又係一個歷史紀錄，將來未必再無，但肯定唔係短期之內可以再見到！
大行唱好 跟車小心
長實、和黃爆升，主要由合併條件決定，第一下爆上去都反映咗大部份好消息，全世界最聰明腦袋都計緊佢哋值幾多錢，手上有貨要賭沽唔沽，手上無貨要賭追唔追。聰明腦袋一見兩隻股都開到個高價，之後回吐一段，好似長實，一開市無耐抽上150.3元，升20.4%，最終收143.2元，升14.7%。和黃亦係高開103.1元，升18%，最終收98.35元，升12.5%。我昨日話「唔好高追」，都無老點大家。
長和今次改組，無論政治經濟都引起大迴響，政治層面的揣測，唔係陸羽仁的一杯茶，有興趣反而係呢劑大茶飯往後個局係點，上周五公佈時長實換股比例係1換1，和黃換股比例係1換0.684，引發和黃會唔會加價的討論。
市場呢個反應相當正常，因為市場見李超人喺合併後等於變相增持和黃，自然覺得佢係黃帝女，嫁妝應該豐厚啲。有中環茶友用白頭宮女話當年的口吻，憶述上世紀和黃私有化國際城市的情況。當年國城坐擁大量物業同現金，連牛頭角順嫂都知佢遲早會私有化，結果和黃係呢個過程扭來扭去，試過「柯化」，又試過加價，唔單止小股民睇到眼都花，連基金經理都俾班聰明腦袋玩到頭擰擰，唔易玩。
茶友話，星期五有人估李超人可能會加價，但家和黃已升咗12.5%，市值暴漲468億元，再講加價就難啲啦。
若然計劃唔通過，股價打回原形，咁小股民同基金經理都會唔見錢，故此股價一輪急衝，先令大股東處於有利位置，跟住就要睇吓持有和黃的大基金點樣計數啦。
對於長實、和黃兩間公司整合再分拆，非地產業務歸日後的長和，地產業務則納於「打包」後重新上市的「長地」，各大證券商以純投資角度，幾乎全部唱好。最樂觀為摩通，認為重組可釋放價值，除去長實控股股東的折讓，和黃因整體業務增長令股價受惠；維持兩者「增持」級別，分別予目標價182元及124元，估算有42至46%上升空間。我單純睇股價走勢，昨日兩隻股都係一開急升跟住回吐，15分鐘後就橫行咗成日，差不多一條直線咁，波動不大，除非收購條款有變，我又唔覺得有大波動的空間，所以短期好難睇升咁多。但重組係幾個月後之事，邊有人知，所以我覺得好難睇得咁高價喎。
長和系股票玩晒
摩根士丹利指重組未見為和黃帶來即時的淨資產值提升，同時，本港樓市業務表現或波動，而油價跌亦對赫斯基能源盈利帶來影響，因而降和黃今明年盈利預測9%及8%。
不過，該行預期市場對和黃盈利下調已完結，仲估計英國及意大利的電訊業務或有所動作。另外，花旗就講到，李氏家族於長建(1038) 持股比重會由16.91%，升至23.5%，對長建前景看好。
昨日大市都係睇長和系做晒主角，恒指高開199點成為高位所在。內地上證指數開市已跌穿十天線後跌勢加劇，臨近中午恒指一度倒跌14點。午後內地股市回穩少少，上證跌1.7%收市，內地股市仲在回吐氣氛中。恒生指數收報24026點，升106點，但長實、和黃兩股已為恒指貢獻149點，若唔計佢地，個市要跌；成交由上周五的1244億元，縮至899億元。
陸羽仁
金融High Tea 舊文