異動空間：券商被罰打手板
中資股黑天鵝認真多，阿爺打貪以為只關民企事？錯了，央企中海外（688）一樣中伏，路邊社消息話華潤置地（1109）跟佳兆業（1638）一樣，都有不少收地重建項目，當中涉及的官商利益千絲萬縷，若揸正來查應該得震冇得瞓。有貨點辦？都係嗰句，有懷疑宜先沽，小心駛得萬年船，保住個本日後大把機會報仇。
另一邊廂，內地券商股又爆鑊，中信証券（6030）、海通證券（6837）及國泰君安（1788）涉於融資、融券（即係孖展、沽空）業務違規，被中證監罰停新開「兩融」賬戶三個月。冇得再吸新客，影響一定有，但不嚴重，純粹打手板。睇番券商股走勢，過去個多月一直橫行，跑輸內銀、內險股。如今調查有裁決，罰得唔算嚴重，反而可當好消息咁睇，成為追落後動力，當中冇被點名的銀河證券（6881）不妨一試。中州證券（1375）第四季盈利飆升近九倍，賺2.66億人仔，也有條件爆上。
一月過咗一半，暫時結論係難炒到暈！市場消息既多又混亂，跟車太貼好易炒車，保持均速，耐心等待明確方向出現，屆時再全力撲向獵物，方可事半功倍。
魏力
http://www.facebook.com/2012jason
魏力
異動空間 - 魏力 舊文