魚樂無窮：高息股強到爆的啟示
■領匯呢類高息股全部向高位進發，就知市場避險情緒高漲。 資料圖片
港股果然蝦人玩，無他，資金自由進出，外圍同阿爺有乜風吹草動，都足以舞到大家頭暈。內地新一輪IPO完成，以為A股可以大炒特炒？咁你就太真了，中證監上周五表示，信証（6030）、海通（6837）同國泰君安（1788）融資融券違規，相關業務要停賽三個月，話短線氣氛冇影響就呃你嘅。但從好嗰方面諗，定好遊戲規則，大家依本子辦事，A股呢隻牛牛可以更健康成長，變相先苦後甜。上周五推介銀河證券（6881），不在被罰之列，三角形走勢依舊，不失守九元可續持有。
另一邊廂，歐央行即將公佈新一輪量寬，瑞士就先發制人，突然宣佈將瑞郎脫歐，消息刺激瑞郎單日曾升三成，有外滙交易商因此瀕臨破產。咁啱得咁蹺，港交所（388）提出停板機制建議，凡恒指H指成份股五分鐘內升或跌一成，將設五分鐘冷靜期。黑天鵝日益普遍，外國勢力隨時入侵，藍籌重磅股設漲跌停機制，唐牛舉腳贊成，如果能夠叫公司同時解畫就更佳。不過，新制係咪適用於二三線股，唐牛有保留，老老實實，炒細價股預咗有風險，升跌一成乃平常事，小心水太清冇魚。
大市喪吹無定向風，其實冇乜好講，你睇領匯（823）、置富（778）、電能（006）、長江基建（1038）等高息股全部向高位出發，就知避險情緒有幾高漲，既然係咁，少做少錯吧！
唐牛
https://www.facebook.com/tongcow88
唐牛
魚樂無窮 - 唐牛 舊文