異動空間：天虹圓底爆升
炒港股堅係難，A股喪升跟唔足，美股急插又飽吃驚風散，日日追漲殺跌，肯定多做多錯。羅馬非一天建成，既然A股大漲小回格局已成，不妨買定離手，資金較少、買唔到太多隻的，簡單分為三份，中資金融、基建、內房各一隻，再懶就齋買隻A股ETF，除非個市轉勢，否則不理短期波動，撲暈自己等收成。一升就想獲利，一跌就問止蝕，輸使費仲隨時一沽就絕塵而去。練好坐功才能贏更多。
大價股回氣，資金轉追落後科網股，但跌足大半年後，一街都係蟹民，唔想成為一份子，都係無謂費神去賭；如有蟹貨在身，更不宜加注溝淡，在錯誤的投資上增加注碼實屬不智。
天虹紡織（2678）係魏力早兩年愛股，兩個幾首次推介後，一年狂炒至16蚊，死坐真係可以發達。但去年國際及內地棉花價格跌咗三成，直接影響天虹盈利，拖累股價回足七成。橫行半年後天虹近期以圓底慢慢捽上去，外資大行牌頻現，成交開始上力，似有爆發之勢。安徽昨出台棉花補貼政策，其他省份或有相類政策出台，有望引爆天虹股價升浪！短期先睇7.5元，跌穿5.9元止蝕。
魏力
http://www.facebook.com/2012jason
魏力
異動空間 - 魏力 舊文