金融High Tea 2015年1月7日
四大腳軟金剛
2015年01月07日
內地周一復市大旺，港股唔升，已經係異象，果然晚上開市，美股就插咗落嚟，港股美國預託證券ADR都唔靚仔，昨日開市就係咁插低，最多跌409點，雖然收市只係跌235點，但有好多傳統藍籌都見了一年低位，包括匯控(005) 、和黃(013) 、金沙(1928) 、銀娛(027) 四大腳軟金剛，主要都係同歐洲及澳門有關。
金沙收報35.95元，跌3.5%；銀娛造39.85元，挫4.3%，雙雙成為表現最曳藍籌。匯控收造71.75元，跌1.6%；和黃跌2.3%，收86.55元。
澳門股表現差，陸羽仁已經講解過好多次，都無謂再提，總之澳門博彩業高增長不再，同時大量設施陸續投入，生意慢慢難做，將來金沙的「巴黎人」落成，同威尼斯人一樣咁大，若然生意無大升，條數都好惡搞。目前問題係農曆年將臨，由於去年基數仲係比較高，預計出來的數字好難有驚喜，股價仲要繼續捱。
阿爺撐住中海油股價
匯控過去有年走勢唔靚仔，人升佢呆，人跌佢跌得仲快，主要係海外業務搞來搞去都唔係幾得。雖然管理層大力削減成本，但生意跟住又縮，仲耐唔耐被人罰錢，結果股價弱勢難改。
至於和黃比較特別，佢去年出售屈臣氏股權兼大派紅利，股價一度創近年高位。轉勢始自去年第四季，所以可以相信係同油價有關，因為佢旗下有一大嚿赫斯基能源。油價昨日跌穿50美元一桶，短期仲有可能插深啲，和黃因此股價再落。
有人話，和黃經營百業，有五大核心業務，石油只係其中一瓣，點解佢仲跌得多過專係採油的中海油(883) 呢？陸羽仁覺得呢啲就係民企同央企的分別。和黃係港資，老闆係企業家，股東係投資者，個個按商業原則辦事，你少一瓣賺錢，咁股價就「直PORT尾袋」。
中海油係央企，仲係阿爺能源政策走出去的旗艦，故此唔會畀佢衰，所以經營受到打擊，到咁上吓阿爺就會諗計幫佢，股價跌得少過油價或其他同類股份，一大理由就係佢擁有的特殊身份。從好的角度係佢股價抗跌力比較強，壞處係你想趁低執平貨，佢就未必夠其他油股咁平，如果油價跌到咁上吓，譬如話見40美元樓下想撈貨，咁就買民企可能抵買過央企啦。甚至開個美股戶口，因埃克森美孚可能仲跌得深啲。另外好多散戶鍾意撈底，但我認為呢四大腳軟金剛，暫時都未到可撈的時候，可能仲要衰多兩錢先至到底。
國指回吐 候機低吸
睇番個市，恒生指數全日跌235點；國企指數跌215點，國企今次終於跌幅大過恒指。內地上證綜指由中段下跌至尾段回升0.1%收場，但香港國企跟唔到，主要因為升咁多，要回吐吓，好似早兩日狂升的萬科(2202) 回番4.8%，其他升得少的內房只是微跌，就知只是回吐。我話等國企跌深啲，係吸納時機。
公司賣殼活動繼續，世紀陽光(509) 公佈，向權智(601) 大股東譚偉豪及譚偉棠收購權智5億股股份，佔權智已發行股本41.75%，每股0.4592元，較權智停牌前報價0.495元折讓7%。世紀陽光同時將向權智認購2.4億股新股，佔權智擴大後股本16.67%，每股作價0.32元，較停牌前折讓35%。
權智復牌，收報0.45元，跌近9%，股民高追就中棍。新買家經營鎂合金新材料和生態肥料，聽起上來概念唔算太突出，加上收購價唔係咁高，所以股價聞聲倒下，佢由低位升了一輪，家名花有主，好消息揭盅，短期似乎已經無乜概念炒落去。
陸羽仁
金融High Tea 舊文