笑到最後：
重申一注獨贏買京維
上星期五收市後，夜期一度跌800點，原來中證監疑似為股市降溫，當大家深信星期一會應大跌時，上星期六中證監又出嚟澄清話冇打壓股市。莊家股大家見得多，過往政策市都係焗限於個別板塊，今次面對嘅係「莊家市」，而且，個莊係超級大。
今次大牛市唔係慢牛，而係「勒牛
」，因為大陸好多人想炒起個市，政府又唔敢一棍打死，所以升啲，勒住，再升啲。而家可能唔驚佢跌，因為信大牛市，就一路揸住；最驚係大市會喺恐慌中陰升，萬眾期待嘅大調整，可能會變成阻礙大家入市嘅心理包袱，未上車、落咗車嘅戰友，睇嚟都要著量買啲，然後遠離報價機。
4月7日，高明於本報「第二季潛力股推介」，推介京維集團（1195），當時港股已經炒到癲，當時京維股價為0.47元。隨後過一星期，京維冇鬱過，喺人哋食翅你食風嘅時候，士氣遭到重大打擊。
上星期四，京維收集完成，下午極速炒上，一度升四成，最後更上升幅榜。星期五高開市最高見0.68蚊，單日即刻大跌回落至0.55蚊，跌逾11%，明顯係震倉。加埋中證監搞兩搞，可能震多一兩日，咁就出現一個絕佳再入市機會。
收集完成 極速炒上
炒京維，因為公司唔賺錢，過去四年皆虧蝕，最近賣埋電子業務後，得番黃金開採業務同物業發展業務，可能清緊殼，轉做內房殼，估計將來甚至會出售黃金開採業務，當內房殼咁賣，叫價都高一啲。
就算唔賣盤，京維都有炒股往績，過去三年，巧合地，第二季都會炒上，平均炒上44%，舊年升幅更達73%，之後打回原形，但年尾又再炒上。維持上市地位要錢，買股票為賺錢，賣股票更加為賺錢，炒上去嘅需要，可能有人比起散戶更迫切。
睇番過去四個月，0.43蚊就係個底，而家已經爆第一棍同震倉，嚟緊就考大家定力。當日第二季之初，建議大家0.485元買入，目標價睇1蚊，未走的話暫時升幅13%，原本建議止蝕價0.4蚊，而家輕輕調高到0.43蚊，穿咗唔一定玩完，但落番嗰啲水位唔知要再等幾耐，不如認輸搵下一隻。
京維個戲棚由12月暴跌七成，收咗四個月貨，終於收齊爆上，就好似大家對牛三嘅預期一樣，升得十日，肯定未完。同一道理，京維亦冇理由炒一棍就完，再加上遇上八年一潤嘅大牛市，唔大炒對唔住自己。所以，今日重申一注獨贏買京維！
高明
https://www.facebook.com/bigricetea
本欄逢周一刊出
高明
笑到最後 - 高明 舊文