魚樂無窮：克莉絲汀爆炒三部曲
■克莉絲汀噚日大棍崛起，話唔定有好消息跟尾。圖為集團主席羅田安。 資料圖片
大市一日地獄一日天堂，周一失地瞬間收復，恒指再度逼近二萬八。早前強勢股如鐵路及航運板塊開始回氣，土炮券商股則接力炒上，貨如輪轉格局不變，反映資金依然滿瀉。
細價股失驚無神有股權變
動，已經成為爆升指標，首季曾推介不約而同批股嘅卡撒天嬌（2223）及Mega Expo（1360），平均升幅逾倍，後者噚日仲停埋牌，相信好事近了。噚日十大升幅榜中，搵到隻有同樣氣場嘅股份——克莉絲汀（1210）。
「喂！升咗三成喇喎，仲有得去？」首先，冇人叫你鬥搶，可以候回吐吸納；其次，爆炒三部曲其實一早奏起︰舊年8月，第二大股東丸紅株式會社盡沽12.03%持股，由獨立第三者林煜接貨，股權突然有變，必有所圖；舊年12月，公司宣佈委任高海明任非執董，本來高層調動乃平常事，奇就奇在高海明以往主要喺內房公司打工，與賣麵包及蛋糕嘅克莉絲汀，風馬牛不相及，呢鋪係高生定克莉絲汀想轉型，自己想想吧；今年2月，公司宣佈盈警，但其後股價一直向上，十萬個不尋常，似乎有心人正密密收貨。
再睇睇街貨分佈，五成貨不在CCASS，頭十大券商揸咗44%，用市值7億計，條街只得幾千萬貨，乾到爆！噚日大棍崛起，話唔定有好消息跟尾，第一個目標︰NAV價0.92元！
唐牛
https://www.facebook.com/tongcow88
唐牛
魚樂無窮 - 唐牛 舊文