笑到最後：大笨象點樣再起飛
上星期五，恒指一度升超過300點，但留意，成交只得1,300億元鬆啲，係大時代以嚟最低，係咪跌完一支箭升番上去答你唔到，但正如5月初嘅一記悶棍打醒，仲未到派錢時刻，適合儲貨多於瞓身。
篇幅所限，之前持貨點算好，請上本欄臉書專頁。滙控（005）上星期一隻推高
大市，引起咗高明注意，今日想集中講。
講滙控，好多分析員會由浦偉士、龐約翰講起。高明年資尚淺，未幸親見，所知都係來自前輩嘅筆觸。既然都係抄書，高明選擇走入歷史，由作家高陽筆下、清代同治三年講起，去理解滙豐係咩一回事。
歴史小說家高陽筆下，最著名大作係《胡雪巖全傳》三部曲，喺佢筆下滙豐佔有後半段好大篇幅，因為清代商人胡雪巖代表嘅滿清政府，係當年滙豐嘅一個大客。
大家成日話滙豐係英資，據書中所述，滙豐原名「香港上海銀行有限公司」，150年前同治三年總行設於香港，創始資本500萬港元，由英、美、德、中東，甚至華商資本組成。胡雪巖助手古應春係滙豐買辦，亦係股東。相傳「滙豐」名字係由古應春所題。
當年滙豐崛起，重用華買辦，經胡向滿清放貸，因為清朝弱，冇錢，滙豐賺取中間人錢財。近年滙豐成日被西方國家罰款，證明西方亦都唔太覺得滙豐係自己人。就好似混血兒咁，香港人覺得佢係外國人，西人又覺得佢非親生仔，滙豐僱用買辦在華做生意，其實滙豐都係一個買辦。
用呢個歷史角度推斷，衰落表面睇係冇人當佢親生仔，個個都恰佢；實際上，係中國近年太強大，已經毋須要外資買辦代為行事，滙豐百年在華英資地位無用武之地，本業不振，其他都諸事不順。
靠三大因素帶動
滙豐要再度強盛，勿忘初衷，由買辦做起，本欄推斷有三個因素：一、中國由盛轉衰，再次要借債度日；二、委任一個同古應春相當地位嘅人做現代買辦，呢個人要接通中南海，同時又得英資信任；三、中國收購滙控。
任何一個情況發生，滙豐股價都會係冇目標價無限上升。試諗嚇，當年滙豐做香港代表銀行已經咁勁，學「獻世派」話齋，香港GDP只佔中國3%，已經曾令滙豐「和平崛起」；上述三個情況，係假定滙豐成為中國外資代表銀行，一間銀行代表現今中國，即使經濟稍為回落，會係幾咁恐怖？
但係暫時都未見呢三件事出現，講完。
高明
https://www.facebook.com/bigricetea
本欄逢周一刊出
高明
笑到最後 - 高明 舊文