中環在線：
國泰前空姐話當年
富豪送香水追女仔
■林愛華後生做空姐時美人胚子，現在依然風韻猶存。 
空姐係特別嘅行業，總覺得靚女空姐好容易識到才俊或富豪，國泰（293）主席史樂山嘅太太以前就係國泰空姐，成功搵到呢隻「潛力股」。喺
國泰工作42年嘅前空姐兼儀容顧問林愛華（Iris）透露，富豪追求空姐的確好有計，一位本地富豪亦曾轉折送香水追佢。
𠵱家男仔想識空姐，可以直接抄牌，問攞手機號碼，幾十年前冇手機，男仔亦較為含蓄。來自新加坡嘅Iris憶述，1974年國泰開辦香港直飛澳洲悉尼航線，佢係呢條航線7名空姐之一，「成日遇到同一位著恤衫嘅男乘客，佢屬運動型，見多幾次就有印象。」
有一次「恤衫男」忽然開口，問佢「你用嘅香水好特別，係邊隻牌子？」Iris禮貌地講出牌子就走開了。
出手豪爽 幾十年不變
直到有一日，Iris被召去見高層，佢以為大禍臨頭，點知老闆只係遞上一樽佢跟「恤衫男」提過嘅香水，內附一張卡，裏面有兩句英文，大概意思係「希望你鍾意，如有時間一齊食飯」當然仲有電話號碼，直覺話佢知對方係「恤衫男」，但佢最終冇搵對方。
佢後來先知對方係本港富豪。佢講笑話，𠵱家諗起都呻「哎呀，走寶喇！」不過又咁講，當年坐得起飛機嘅人非富則貴，可能此君唔係Iris那杯茶啫。
佢都話「以前嘅乘客多數做生意或係有錢人，當時冇手機，佢哋多數向空姐派卡片。有男仔會搵埋空姐住邊間酒店，上房叩門㖭呀。」
而且富豪出手追空姐一向豪爽，幾十年來不變，「通常佢哋會問空姐Off Duty去邊，然後包曬成隊Crew去食飯。」爭取機會認識心儀嘅空姐。
因此，Iris轉做儀容顧問後，為激勵空姐士氣，成日講笑話「Come on girls．There"re lots of millionaires out there！」
【林愛華簡歷】
年 齡：67歲
1972年：加入國泰當空姐
1989年：轉做制服及儀容標準助理經理
2014年底：退休
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文