異動空間：神車的無敵賣點
戰友一望條題，以為魏力揸流攤，想寫停牌中的南北車？錯了。真正的「神車」應是今日介紹的神州租車（699）。有幾神先？至少四方面，一、神車搵咗世界男神之一碧咸做代言人，大陸人愛國但崇洋，你懂的！二、中國14億人口，但租車市場方興未艾，隨著中產高速崛起，自駕遊需求
將現爆炸性增長。神州租車目前為中國最大租車商，去年底車隊有6.3萬架車，首季估計增至7萬架，排第2至第10的車隊加埋都唔夠神車咁多！在此「燒車」行業財雄勢大者勝，最近與上海大眾汽車合作，日後料更多車商靠攏，強者越強。
三、O2O網上落定，網下拎車，安全、價格、接單率三方面，神車遠遠拋離對手。集團全部用正規租賃車輛，唔怕係黑車，司機均受過培訓。租車範圍涵蓋70大城市。規模效應加上優惠不絕，神車質優之餘價格亦較同業低。四、港股通股票，品牌效應勢吸引北水繼續掃貨。另摩通剛出報告將目標價提升至21元，連外資行亦認同加入追貨，股價勢水漲船高。CCASS顯示，首十大證券持股近95%，街貨乾曬，要搶唯有付出更高價錢喇！
魏力
http://www.facebook.com/2012jason
魏力
異動空間 - 魏力 舊文