金融High Tea 2015年5月22日
單日升跌玩死人
2015年05月22日
A股升勢停不了，內地股市連升三日，滬指再創7年新高，但港股依舊懶理，繼續背馳，人升我跌，成交得1245億，似乎係缺乏內地水來港炒作，不少「港A股」唔係好掂，早前熱炒的軟件股也回吐。
火棒亂遞睇到眼花
反而股仔爆上爆落，充份體現內地炒作特
色。內地炒股升到你唔信，跌到你唔信，已經係潛規則，尤其係創業板，幾乎可以用SKY IS THE LIMIT嚟形容炒家嘅想像力，呢種瘋狂炒作手法移植到香港，終於可以發揮得淋漓盡致，皆因香港無升跌停板制度，炒家唔單止炒上唔怕漲停，仲可以玩埋即日來回，大玩鬥大膽遊戲，呢個炒股規則喺內地無得玩，香港就成為新內地，看來內地炒家開始品嚐到呢個炒法的滋味，所以好多股仔禾雀亂飛之餘，進銳退速，真係睇到本地股民O晒嘴。
遇着呢個大時代，都幾考股民定力，喺見到咁嘅亂象，就要學志雲大師金句：唔好驚、唔好亂，最緊要知自己做緊乜。呢啲股仔炒上，部份真係有料到，至少在內地做生意有紋有路，部份則係博大霧，生意完全唔掂，或者放大100倍。但股民普遍心態係唔理咁多，見到隻股大升就湧入去，基本上都唔知炒乜，遇着咁情況自然好蝕底。所以喺落注前，至少都睇睇個圖，睇睇公司市值，或者探究吓公司資料，自己有少少把握先落注，否則只能當自己買輪盤，隨時遇咗輸清離場。
好似昨日有隻叫百靈達國際(2326) ，開市爆升，由上日收市12元，最高見過15.7元，爆升31%，午後走勢大逆轉，最低大插見過6.85元，倒瀉43%，最後又倒升番，上番12.1元收市，股價同上日差不多，但中間的過山車真係坐死人啦，香港冇停牌制，就任人亂炒。
百靈達主力係做電子產品，過去幾年曾經又拆又供，公司時賺時蝕，時常無息派。過去一年佢只係毫子，淨值每股0.075元，但股價高達12.1元，市值去到246億元，一睇都知佢係「乾炒牛河」。呢類股份大媽風險胃納高，可能唔怕照炒，本地股民如果落場，都會知係加入玩傳火棒遊戲啦！
股仔癲炒令人覺得個市好似唔正常，有中環茶友擔心呢個係「上帝要他滅亡、先要使他瘋狂」的預兆。對於呢個睇法，陸羽仁就無咁悲觀，覺得呢個只係港股參與者變換的現象，更大的圖畫係中國金融市場的範式轉移。個別股份喪炒，不代表大市升得無道理。?家內地希望推動企業發展，增加市場自主性，希望加大股權融資比重，取代過往向銀行借貨的方式，喺呢個大環境下，股市以「慢牛」形式運行係最有利的方向，因為咁樣可以令公司不斷上市集資，改變資金供應的渠道，港股喺呢個大氣候下，都應該有相同方向發展，只不過由於港股本來有唔少外資參與，佢哋喺升市初期無參與到，?家繼續觀望，令大股落後於A股，資金咪炒住個別股份先囉。
再爆千億蒸發事件
內地股市強勢持續，令港股失復收地，午後一度倒升26點。不過，尾市沽壓再度增加，恒生指數收造27523點，跌61點；國企指數收報14132點，跌103點，成交金額1245億元。市場話題係繼漢能(566) 離奇暴跌後，高銀系今早突然重創，兩隻股份在兩小時內，市值共蒸發逾1,778億元。
高銀系主席為內地人潘蘇通，近年高銀系股份喪升，佢亦搖身一變成為2015年《福布斯》華人富豪榜第27位，身家61億美元。市場有傳聞稱高銀系與漢能關係密切，其中高銀金融是漢能的財務顧問。集團午後稱業務和營運一切運作如常，惟股價仍要重創，高銀地產(283) 大跌41%，收造14.36元；高銀金融(530) 則狂瀉43%，報17.48元，為包尾港股，佢狂跌後仍然高達1220億市值，乾炒味濃，呢啲「忽然爆煲股」好難玩，少掂為妙。
陸羽仁
金融High Tea 舊文