魚樂無窮：高息股如何變零成本
■信佳現市值7.4億元。圖為集團主席吳自豪。 資料圖片
有戰友喺facebook留言問，上市公司派息會喺股價扣減，變相係零和遊戲，點解仲要買高息股？冇錯，短線計係左手交右手，但從長線角度出發，高息股每年都畀到穩定而吸引嘅股息，喺超低息環境下，回報肯肯定好
過定存，揀得好隨時可以財息兼收𠻹！唔信？今日推介嘅信佳（912），就係最佳例子。
話信佳係狀元高息股，一啲都唔誇張︰2002年上市，除2006年全年外，其餘放榜日均有息派，合計1.1585元。「嘩！咪比招股價1元仲要多？」快而準！長情股東由新股揸到而家，已收回成本有餘，仲未計之前送紅股因素，往後持股升值及股息，全部係啖啖肉嘅盈利！
「股價創新高喇喎，仲買得過咩？」一齊睇睇數據︰現價市盈率9倍，息率7.1厘，市值7.4億，兩大股東持貨逾六成，有齊平靚正、貨源歸邊、細細粒元素，越升越有是常識吧。
同傳統工業股不一樣，信佳與時並進，積極打造寵物手機app，為首個以寵物相片分享為主嘅交友平台，寵物主人可互相交流之餘，公司更可提供線上線下服務，一舉多得！負責領軍嘅太子爺吳民卓，上月正式升呢做執董，意味第二代順利接捧。呢個可遇不可求嘅投資機會，無論基金或散戶聽到都流曬口水，每次回調都係吸納之時！
唐牛
https://www.facebook.com/tongcow88
唐牛
魚樂無窮 - 唐牛 舊文