中環在線 - 李華華 2015年7月29日
中環在線：細妹陳諾韻升職
甘比姊妹齊做華置執董
■陳諾韻（右）同陳詩韻兩姊妹都係任職銷售及租務部。
華置（127）大股東劉鑾雄（大劉）紅顏知己陳凱韻（甘比）嘅得寵指數上升！華置噚日宣佈，甘比30歲嘅細妹陳諾韻升職，即日起升做執董，同36歲嘅大家姐陳詩韻一齊坐入華置董事局。
呂麗君4月辭任
今次呢個人事變動，表面係妹憑姊貴，但大家唔好唔記得，𠵱家華置主席係俾人話離地嘅富二代劉鳴煒。市場曾經傳過，劉鳴煒與細妹劉秀融，同甘比一家親近啲，好似逢親劉鳴煒宣傳旗下商場，甘比都捧場。
而大劉另一位紅顏知己呂麗君，原本都係華置執董，今年4月忽然話要擺多啲時間喺其他商業同慈善活動度而辭任。
外人當然唔知乜解究喇，不過𠵱家甘比家姐與細妹一齊坐入華置董事局，除咗係甘比得到大劉歡心，亦證明陳氏三姐妹跟劉鳴煒嘅關係唔錯。
睇番華置年報，大家姐陳詩韻舊年年薪有75.1萬元，除開一年12個月，月薪約6.3萬元。細妹陳諾韻升職做董事，年薪亦開始要披露，通告話佢每年酬金34萬元，月薪2.8萬元，少家姐一半左右。
咁都正常嘅，陳詩韻2002年就加入華置，做咗13年，2012年開始升做執董；陳諾韻2008年先入華置。兩姊妹都係任職銷售及租務部，又負責化妝品包括「雙妹嚜」業務。
不過姊妹工作與薪酬都唔係最重要，最緊要係甘比有資產在手。查翻資料，甘比在港有3個物業，同大劉一齊揸住灣仔YORK PLACE地下兩個舖位，2010年買都值成1.2億元，另外又同大劉共同持有深水灣道3號，而佢本人就喺前年用逾2,000萬元，買入華置旗下壹環一個單位送畀阿媽住，平日見佢拎嘅愛馬仕手袋真係算小兒科。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文