金融High Tea 2015年7月29日
虎頭蛇尾
2015年07月29日
港股經過黑色星期一大插後，開市跌後反彈，一度升近600點，但投資者反應仍然審慎，收市升幅縮到得番百幾點，上下波幅800點。內地股表現比香港還遜一籌，上證綜指再度低收1.7%，但叫做穩定番。
黑色星期五 中證監誓查
呢個星期A股嘅
海外股指結算，上海B股昨日離奇大漲5.4%，和A股走勢背馳，唔排除有人隊低A股影響海外A股指數結算，所以無人沽的B股有得升。呢兩日個市咁古怪，中證監講明要追查周一大手造空者，會根據交易所監控報告和投訴舉報反映，組織執法力量重點針對線索進場核查。
查還查，經過兩度震盪，A股政策牛條氣被打到窒晒，無咗政策做精神領導，市場對實體經濟變得關心起來。內地官員對於增長狀況，暫時都要面對現實，唔敢太樂觀。國家發改委綜合司副司長高杲在新聞發佈會坦言，去年中國生產總值規模已超過63萬億人民幣。
今年上半年經濟增長能夠「保七」係非常唔容易。喺結構深度調整，增長動力處於深刻轉換下，增速放緩時期可能還將持續一段時間。
A股上演大時代勁CHOK之際，內地再傳出「北戴河會議」中證監會主席肖鋼要被換走的消息。內地股市由升轉跌，肖鋼成股民箭靶，呢排內地經常傳出各類消息，時真時假，喺正式公佈前只能聽住先。
喺缺乏好消息下，雖然人行再開展500億元人民幣逆回購，上證回升逾1%後未能配合升勢，上證指數全日收報3663點，跌62點，深成指數全日收報12316點，跌176點，兩市成交金額1.3萬億人民幣。
港股昨日就虎頭蛇尾，指數一度飆596點，高見24947點。下年見到A股弱勢未止，令港股午後升勢大為縮減，最終恒指全日只升超過151點，收造24503點，國企指數收報11173點，跌57點，成交1153億元。
雖然大市升百零點，主要靠兩隻金融股撐起，匯控(005) 與友邦(1299) 推高恒指92點。匯控收報68.85元，升1.62%；友邦升2.65%，收50.35元。好多同A股關連嘅板塊都仲係弱勢，最明顯係證券股同內險股。
中信證券(6030) ，廣發證券(1776) 挫5.7%，報14.32元。個別內險股捱沽得幾厲害，平保(2318) 紅股兼派息除淨，股價隨內地股市下跌，該股收報46元，跌2.4%；新華保險(1336) 挫5.3%，報33.8元，跑輸一眾國企指數成份股。
東航好消息出貨
東方航空(670) 停牌多日後宣佈以溢價8.6%，向美國達美航空公司配股。復牌後補跌，股價挫4.4%，造6.6元，由於有配股消息，東航股價同高位比唔係調整得太多，好消息有人出貨就唔出奇。油價弱對佢做生意有利，若鋤得夠深時可以考慮撈貨。
曾經做過基金經理、被部份傳媒捧為「亞洲股神」的東尼(Tony Measor)昨晨離世，終年82歲。
東尼在香港、倫敦及亞太區投資近半世紀，十幾二十年前他開倉寫股，走的路線信奉公司基本因素。最初他大力建議買入匯控長揸，當時適值大笨象當打之年，走出香港東征西討，股價曾經漲升，令組合帳面升值唔少，吸引一班追隨者。近十年匯控表現令人失望，無復當年之勇。投資唔使成日中，最重要係唔好輸大錢，同一世人食中一、兩個機會，咁就已經好夠，但呢樣嘢講就容易，要做到就幾難。
東尼因為年事已高，呢幾年身體轉差，不再公開撰文講股，他的離世可以話係一個時代的終結。
陸羽仁
金融High Tea 舊文