一周三件：蔔蜂蓄勢彈出
■謝國民任主席的蔔蜂國際，股價有機會翻半番。 資料圖片
祖國豬價創咗三年高位，場內主打豬飼料嘅大哥大蔔蜂（043），有運行。上番摩通嘅1.7元目標，現價（1.08元）已講緊要翻半番，有得諗。
估值平絕同行
祖國6月豬價同比增加咗7%，兼連續四個月，錄到同期增幅
，扯到上三年高位。又農業部數據，呢個月第二周，豬價同比更加上升咗26%。睇番蔔蜂，上年豬飼料就佔咗集團祖國分部收入一半水位，去到134億元，唔係嘢少。呢轉祖國豬價turnaround，有機會刺激低迷咗好耐嘅養殖業，蔔蜂嚟緊將有運行。再講，蔔蜂系老闆謝國民，係泰國首富，而母系無論喺農牧、食品等瓣數都係有經驗嘅大孖沙級數。又上年中，蔔蜂引入日本五大商業機構之一嘅伊藤忠（日8001，市值1,500億元）做策略性股東，有呢個背景同競爭優勢，蔔蜂彈出！
事實亦係咁，蔔蜂喺原有養殖同飼料瓣數，加多個食品加工，當中秦皇島加工廠應該投入試產，成瓣喺另一個中線盈利增長turbo。場內專業評估，蔔蜂今、明、後三年EPS係8.3仙、8.5仙同0.13元，2017年EPS預測增長53%，突飛猛進，就係新加入瓣數同飼料養殖業重拾升軌有關，呢一年預測PE得8.1倍。祖國行家金新農（深002548）32倍大北農（深002385）同年預測16倍PE、通威（滬600438）13倍，蔔蜂平咗大截！
蔔蜂分拆主打生化同工業瓣數嘅正大企業（3839）上市冇耐遇正跌市，但仍為蔔蜂帶嚟近1億元賬面增值。亦諗到係，上邊新搞食品加工業，煲得好一樣可以好似正大企業咁搞分拆，為蔔蜂帶嚟更肥仔增值。
買蔔蜂，當上番摩通目標價1.7元，2017年預測13倍PE，啱先追到最近磅嘅通威，但未有耐追到其他行家。
錢雋
細價股專家
本欄逢周一、三、五刊出
錢雋
一周三件 - 錢雋 舊文