魚樂無窮：美加息周期何時開始
■美國聯儲局會議結束，一如預期未有加息。 資料圖片
美國聯儲局會議結束，一如預期未有加息，更隻字不提時間表，但今年必定加息嘅訊息已深入民心，相信一次半次上調利率，絕不會推冧股市，美股甚至反高潮再破頂。
「如果加息周期展開，環球資產市場肯定有大震盪啦！」呢
句說話絕對正確，但問題是加息周期會否展開呢？打個譬喻，職業足球員勇戰斷腳，做完手術後要密集式進行物理治療，配合操練肌肉及體能，待一切回復正常後才會復出，斷不會貿然搵命博。美國經濟亦然，金融海嘯後一潭死水，儲局透過瘋狂印鈔，死馬當活馬醫，直至近年終於有起色。
加息後對經濟嘅影響如何？相信連耶倫自己都唔知，惟有用時間去驗證，但用咗咁多年先有成果，加息路線圖一定要小心打造，用一年時間觀察，其實絕不過份。試想想，儲局早前退市，都用咗差不多一年時間，情況有如窮債仔還錢咁︰逐步逐步褪。所以加息周期再現之說，似乎難以成立。
吹水多日，再唔推介股票，我自己都接受唔到。體育用品龍頭安踏（2020）強勢破頂，下周三公佈業績，公司近季訂貨會及同店銷售，持續錄得低雙位數及高單位數增長，業績已有保證，近期一直守穩100日線（昨處17.3元），如果業績後有好消息出貨現象，挨近呢個水位要入場。
唐牛
https://www.facebook.com/tongcow88
唐牛
魚樂無窮 - 唐牛 舊文