金融High Tea 2015年7月31日
港交所唔夠平
2015年07月31日
美國聯邦儲備局開會，一如陸羽仁所講，如果無乜特別，會後可能唔會有好多嘢講。聯儲局主席耶倫在會後無開記者會，聲明只是對勞工市場睇好番啲，沒有明示加息，市場估計9月加息機會下降，今年利率上調好可能只係一次，美股因此造好，收市升幅略為收窄
，杜指升咗121點。由於美股之前已經反彈，相信9月加息機會下降唔會令市場太興奮。
外圍造好，港股高開，由於境外富時A50期指昨日在新加坡結算，國家隊前一日收市時進場，恒指昨日高開200點，但指數喺午前除除回落。
成交得番八百億元
新加坡富時A50指數期貨在7月尾有65萬張未平倉合約，昨日表現波動，走勢與內地滬深300指數大體同步，7月合約收跌315點，跌幅2.8%，報10910點。8月富時A50期貨則跌365點，收報10525點，比即月低水385點，未平倉合約達49.8萬張。有近50萬張期指轉咗下個月倉，即是未夾到淡友投降，下月仍然有得鬥。
可能因為未夾死海外期指淡友，好多淡友未平倉，阿爺只求穩守，沒有夾硬頂高指數，留番彈藥下個月慢慢玩。滬指整日大幅波動，午後滬指由升近1.5%轉跌，收市大跌近3%，全天振幅超4%，收3705點。創業板重挫5%。
內地股市向下，午後港股沽盤增加，挨近低位24478收市。恒生指數收造24497點，跌121點；國企指數收報11137點，跌136點，成交縮減至802億元。
內地股市一輪急升暴跌，好多經濟學家提出意見，認為有改變市場結構的需要。曾出任人行貨幣政策委員會委員的清華大學金融系教授李稻葵就話，早前股市暴漲，最主要原因是社會期望值和股民信心出現暴升。他形容暴跌是對「非理性繁榮的報復」，因為前陣子漲得太高，有很多股票是虛高的，很多爛資產都在暴漲，所以暴跌是必然的。但政府為了穩定市場預期，有必要出手救市。
李稻葵認為，上證指數處於3700點至3800點的水平較合理。當大市穩市下來後，要設法改革機制，不能搞那麼多的槓桿，而且要允許市場作結構性調整。
港股成交奀豬，港交所(388) 跌1.3%，報210.2元，港交所在A股威震兩地時，成為基金散戶齊齊追捧的股份，股價好快由低位爆升一倍，以市值千億藍籌嚟講真係好罕見，依家佢插咗成百元，好多散戶心思思撈底。但如果睇番佢累積升幅仲係好大，加上年初股市交投700、800億元之時，仲股價只係140、150元，可見依家股價仲係唔平，如果個市成交短期唔上番去，相信佢仲有機會下試低位。
商場股有排捱
另一類股份睇落仲未跌夠，就係商場股如九倉(004) ，九倉一年高位63.9元，昨收49.25元，高位下調唔夠兩成。呢排好多報道話名牌店要求減租，九倉雄霸廣東道同銅鑼灣，無可避免受影響，而且九倉透過海港企業喺內地買唔少地，內地房地產放緩，九倉必然會受壓。
睇番個圖，九倉股價其實比個市早見頂，年初佢已經喺60元樓上跌落嚟，五、六月份雖然恒指大升，佢都無法上番高位，反映大戶對前景唔係咁睇好。九倉依家息率有3.68厘，睇落幾吸引，但息率咁高主要係股價回落，仲要留意係來年佢派息能唔能夠保持。
講起商場股，喺中港兩地都有好多場的恒隆地產(101) 董事長陳啟宗就話，A股從年初至今其實已累積一定升幅，不少投資者都賺得利潤，故近期A股波動，不會影響內地消費市道。陳啟宗呢個講法可能比好多中央官員都樂觀，究竟應該信邊個，股民不妨自己揀。唔講A股股災，單係美元強，本地消費品已變相加價，對旅遊零售係負面因素，所以商場股同零售股一樣，都係處於寒冬期，未來仲有可能要捱？
陸羽仁
金融High Tea 舊文