一周三件：銀河證券值博
■陳有安任主席的銀河證券，今年頭五個月營業收入勁升至近百億元，有博盈喜條件。 資料圖片
銀河證券（6881）短短個半月累跌咗36%，返番去3月起步位，2017年度預測PE得番7.4倍，平絕內地券商股。以中國會計制計，銀河證券今年頭五個月營業收入99.2億元（人仔
．下同），淨利潤39.7億元，已超過該行上年上半年48億元總收入，同13.5億元盈利。嚟緊半年度成績單，有得博盈喜。
估值平 業績靚
呢轉A股跌到趴街，但阿爺係有心湊大呢隻牛，通過資本市場創造財富。嚟緊日子，財金政策繼續開路，機制完善。上月深滬各大指數月線圖扯到極超買區，經呢轉一跌，乜技術性超買都消化曬，隻牛遲早返嚟。就銀河證券本身，上年全年計數，該行開戶市佔率排行業第一、融資交易額市佔率近6.3%，排行業第二。至於代理買賣證券淨收入，同股票基金交易市佔率，全行排第三，傳統保薦承銷額，全行排第四。銀河證券絕對係實力之選。
場內專業評估，銀河證券2015、2016同2017年EPS0.97、1.02同1.2港元，現價（8.95港元）今、明兩年預測9.2倍同8.8倍PE。到2017年時銀河證券更只得7.4倍預測PE！同樣場內專業評估，銀河證券NAV由上年底4.8港元，大升77%到2017年時8.5港元，2017年預測PB，得1.05倍！
內地券商股行家，中信証券（6030）今、明、後三年預測14.4、12.4同11.3倍PE，2017年預測1.5倍PB。海通證券（6837）三年預測為12.4、11.4同9.5倍PE、2017年預測1.4倍PB，祖國行家三年平均預測PE，係叫緊22.4、18.5同13.2倍，銀河證券平霸！趁呢轉執平貨，煲銀河證券，當翻半番到13.4港元計數，銀河2017年預測PB先啱啱追到中信PB水位，2017年PE兼先得11倍，仲係平過行家嘅平均值。
錢雋
細價股專家
本欄逢周一、三、五刊出
錢雋
一周三件 - 錢雋 舊文