魚樂無窮：一隻不能跌的股票
■如果同通脹掛鈎嘅iBond都插水，大家就要自求多福了。 資料圖片
企管人話，一宗投訴代表市場潛藏幾何級數不滿個案，所以每宗都要認真處理。放諸股市一樣，證券行內散戶嘅一舉一動，同樣反映為數不少嘅股民心態，所以蘋果每周散戶調查指數，係唐牛必看嘅指標。
星期一
大跌市，《蘋果》報道哭股喪散戶多不勝數，但最令唐牛印象深刻嘅，分別係張太同李太。張太話個市嚟緊有熊味，好多嘢要睇住、要慳啲，李太話輸錢難免，而家要捱麵包，兩個阿太一個結論︰大家都開始勒緊褲頭。
股市唔掂，樓市高處不勝寒，旺區吉舖隨處可見，經濟活動放緩乃不爭事實。股價樓價租金下跌事少，你又慳我又慳，惡性循環之下，最可怕就係通縮重現。回想香港對上兩次出現通縮，分別係1998年金融風暴，以及2008年金融海嘯，前者一直延續至沙士，途中更出現經濟衰退。還記得當年屋企樓下大排檔，三蚊一份三文治，兩蚊一杯熱飲，五蚊夠食早餐。而家？一支水都買唔到囉。後者好啲，捱咗三季就見曙光。
兩個危機，最後都要阿爺幫拖，包括推出自由行同四萬億救市。一個疑似金融風暴再次醞釀中，但阿爺自身難保，香港再陷通縮環境，絕對唔係危言聳聽。如果同通脹掛鈎嘅iBond（4228）都插水，大家就要自求多福了。
唐牛
https://www.facebook.com/tongcow88
唐牛
魚樂無窮 - 唐牛 舊文