智取大市：港股見底三大條件
小弟近期同唔少戰友吹水，晉佳言談間估計恒指20000點仍未必夠低，戰友們都不約而同覺得晉佳睇得好淡。不過，現價距離20000點，都唔夠一成，跌穿呢個位又似乎冇乜咁奇。
就簡單啲睇番噚日大市，撇除MSCI換馬令恒指最後一分鐘曾經夾高200點，指數chok上ch
ok落，收市冇乜點跌，但二、三線股照樣派貨，仲有過千隻股下跌，證明投資者認為整體大市唔夠平，呢啲二、三線股要透過下跌嚟增加吸引力，因此呢一刻未有撈貨長揸嘅勝算，同時亦少有炒股唔炒市嘅空間。更重要嘅係，短線睇淡，就冇犯錯機會。
等中國金融爆炸上A1
其實呢，晉佳並唔認為自己算係一位淡友，原因係一路等緊一個博報復式反彈嘅機會，只不過呢個報復式反彈出現之前嘅低位，要等三大必要條件出現，先至形成。
第一，等一個恐慌嘅理由。目前市場偏向悲觀，但係冇一個驚到世界末日嘅理由出現。
近期內地壞消息一浪接一浪，上周市傳中國減持美債捍衞人民幣，市場就當係好消息咁炒反彈，但呢個其實係潛在壞消息。
倘若中國唔掂的話，加快沽美債套現分分鐘會燒埋美國嗰疊，而美國同你硬接貨就等如送錢畀大陸佬救國，點會咁順攤，唔到生死存亡，美國為免益大陸，又唔會同你QE4，形成放水靈活度大減，亦形成美債孳息率有急升風險，到時或會拖累全球資產價格，因此可能成為終極恐慌的要素。
另外，最近人大常委會刪去商業銀行法中存貸比監管指標，即係大陸不在乎未來金融體系風險，都要先搞呢場危機。呢個消息，表面睇係放水，諗深一層就反映眼前危機可能非常可怕，要用非常手段嚟防洪。
牌面睇嚟，中國金融體系大爆炸唔成為A1頭條，真正嘅恐慌性買入機會好難出現。
第二，等一次恐慌嘅跌市。7月8日，恒指曾經急跌2,139點，低見22836點。不過，恒指目前已經明顯低過22836點，但呢一浸跌市仍未出現一日急跌超過2,000點嘅走勢，反而市場仍然冷靜，未夠恐慌。
等惠理出現跳樓價
第三，等一個跳樓價。恒指跌到10倍市盈率唔夠，似乎好低，但個別大市槓桿股份，股價仍然明顯高過4月升市之前，例如惠理集團（806）噚日收報6.99元，較4月升市前嘅6元樓下仲要高，但以目前市況，好明顯比第一季更差。呢個價，實在未買得落手，至少要等惠理明顯低過6元，先算恐慌價。
上述三大條件未出現，港股好難話已經見底。除非閣下沽期指，否則今個星期繼續齋睇唔做，無謂太早博反彈，繼續等低位出現。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文