中環在線：last day搏命做
黎大鈞眼濕濕走
數碼通（315）嘅員工今日開始，就要過住「沒有阿公的日子」，事關人稱「寸嘴王」嘅總裁黎大鈞噚日last day，正式跟數碼通講拜拜，見阿公（數碼通員工內部對佢嘅稱呼）平日出嚟見記者，霸氣十足，原來佢都有感性一面，噚日同員工farewe
ll時竟然眼濕濕，認真估佢唔到！
同事偷偷搞驚喜派對
咪以為阿公對記者寸嘴，平時對員工都唔會友善得去邊，其實只要你係有料，就唔怕佢寸嘴，一班數碼通員工其實都好唔捨得阿公。
聽講，除咗大圍送別宴，公司內部員工喺兩個星期前已經分開唔同部組同阿公個別farewell，仲搞到早排清減咗好多（阿公本人堅持冇減到磅）嘅阿公，身形反彈番唔少。
雖然阿公平日霸氣外露，但係聽講每個farewell，佢都有同員工深情對話，表現得好鬼感性，仲幾乎每次都講到眼濕濕。
噚日last day，阿公繼續有開會同工作，部份員工就偷偷哋同佢搞咗個小型派對，實行畀個驚喜佢。出席嘅當然唔少得佢兩位好幫手，分別係接佢手做總裁嘅鄒金根同財務總監陳啟龍。
阿公忍唔住眼濕濕，勉勵員工繼續努力，叫大家「好好做落去，畀心機」。阿公出名愛飲茶，一班員工就送咗套茶具畀佢，場面十分溫馨。
調番轉，阿公就冇派散水餅嘞，佢諗住遲啲再約同事出去聚舊。咁又係，離開數碼通，阿公應該得閒好多，大把時間約班舊部出去嘆茶。之不過，數碼通冇咗阿公，大夥兒會唔會好唔得閒呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文