金融High Tea 2015年9月1日
閱兵效應
2015年09月01日
星期四中國舉行大閱兵，個市唔多唔少出現我講嘅「閱兵效應」，好似北京個天出現「閱兵藍」一樣，事情會無端端變好。無論實質或心理原因都好，大家估計個市喺閱兵前會保持穩定，內地股市可以V形由低位反彈近100點，由大跌變微跌0.8%收市，港股喺咁情
況下跟住內地浮浮沉沉，微升咗幾十點收場。
高層被查 中信證券再插
經過七月份暴力救市，中央上個月介入股市的情況有所改變，無再明顯入市買股，但閱兵前又忍唔住出手，個市跌得低又出嚟維穩。另一方面就加強喺資金鏈上操作，除了減息同調低存款準備金率，昨日中國人民銀行公告，央行通過短期流動性調節工具(SLO)操作，投放流動性1400億元人民幣，期限為6天期，中標利率2.35%，試圖增加市場的資金供應，令股價喺低位有足夠購買力承接。
過去呢幾日，中央陸續公佈調查喺跌市中有異動人士，包括《財經》一位記者，佢早前突然登出古仔，話中證監研究退市，消息令A股急挫，中證監急急澄清並無其事。當時陸羽仁已話奇怪，因為阿爺仲喺度救緊市，點會咁得閒去研究點樣退市呢？今次記者被查，除了被指消息錯誤，同時質疑佢喺過程中無向當局求證，內地股市呢次暴升，周邊好多關連人士炒賣消息，暴跌之後古靈精怪特別多。
除了媒體，金融中介同樣係官方調查對象。中信證券(6030) 四名高層，包括中信證券執行委員會委員、董事總經理徐剛，執行委員會委員、金融市場管理委員會主任劉威，金融業務部負責人房慶利，另類投資業務部總監陳榮傑就因涉嫌內幕交易，被依法採取刑事強制措施。
喺消息影響下，中信證券低見15.38元，為表現最曳國企指數成份股，兼創咗一年新低，收報15.40元，跌近5%。中信證券今年高位見過40.5元，?家插近六成，由於股價已經大插，所以在壞消息影響下，股價反而唔算跌得好多。證券股公佈業績，主要反映之前牛市狀況，個個都幾靚仔，但大家都知呢個係十二點鐘之前的灰姑娘，跟住好快就會走樣。
美國聯儲局高層呢排興出口術「唱雙簧」，上星期三號人物話9月唔一定要加息，股市聞言回穩，跟住早兩日二號人物又話未作最後決定。聯儲局想調升息口，華爾街拋貨表態，聯儲局高層就輪流做黑、白面，嘗試慢慢控制市場期望。美股中長期走勢其實唔係咁靚仔，聯儲局官員唔想隨便放棄加息，就變成一把投資懸劍，市場情緒如果對利率前景產生焦慮，短期股市就會好波動。
基建股績靚價唔靚
由於外圍息口前景仲未穩定，股市氣氛仍然緊張。恒指最多跌213點，低見21399點。午後A股跌勢回穩，尾市有番買盤，市況拗腰回升，全日逼近21700點收市。恒生指數收報21670點，升58點；國企指數收報9741點，跌9點，成交金額945億元，由於個市波幅唔大，投資者變成個個觀望，買賣於是靜咗。
幾個板塊中，中車半年多賺6.9%至46.99億元人民幣，匯豐證券話比該行預期差，目標價由15元降24.7%至11.3元，搞到中車股價一度插8%，收市報9.06元，跌近6%，其他基建政策股都俾佢影響埋氣氛，佢入咗股的中國置業(736) 更狂跌82%兼停埋牌。內地三大基建股中期業績有增長，中交建(1800) 、中鐵(390) 及中鐵建(1186) ，中期多賺3至13%，股價集體腳軟。中交建收報9.22元，挫4%；中鐵瀉4.1%，報6.95元；中鐵建插4.7%，報10.16元。市底仍弱，無名腫毒都可以跌。
陸羽仁
金融High Tea 舊文