智取大市：
習近平靠美國化解危機
大家將所有重點財經新聞串連一齊睇嘅話，自然會有一番截然不同嘅觀感。
上個星期日，深化國企改革指導意見一出，A股上個星期一跌到啪啪聲，反映A股股民對於改革投不信任票。然後唔夠24小時，人行話計劃允許境外央行機構直接進入銀行間外滙市場，美其名係人民幣國際
化嘅重要一步，但唔排除係連自己人都放棄支持內地金融體系之下，人行放定風希望海外央行幫拖撐住人民幣滙價。
而呢個時候，中央公佈國家主席習近平出訪美國日程，好難唔會諗，習近平此行目的係爭取美國支持中國金融體系，所謂嘅「維護國際金融穩定」，之唔係講緊維護人民幣滙價囉！
而家中國醞釀金融危機，習近平先搵最難傾得掂數嘅美國著手，無非係想藉住說服美國支持人民幣，就能夠做到牽頭作用，令所有主要國家，跟隨美國支持買人仔，到時全人類對中國有信心，呢場金融危機就不藥而癒。
大連港強勢炒番轉
雖然習近平訪美喺今年初已經決定，但喺內地連番出招都藥石無靈嘅時候，選擇呢個時候公佈訪美日程，仲有另外一個好處，就係可以施展拖字訣，等大家有番幾日憧憬，以便更容易穩定市場信心，呢個絕對係連續10日公佈利好政策消息都得唔到嘅效果。
睇到呢度，就知道中國喺呢場外訪可謂不勝無歸，10月份嘅中港股市，亦係押注喺呢場外訪，即係今個星期至下個星期，港股轉趨強勢，就反映內地呢場金融危機告一段落。
唔好講得咁遠，講咗今個星期先，習近平訪美，就已經提供咗一個安全嘅時間，晉佳偏向認為，港股短線有得反彈，只要外圍股市頂住唔跌，中港股市走勢都會偏好，二、三線股有得繼續短炒。
好耐冇推介過股份，今日較似樣嘅心水有大連港（2880）。早喺8月中，大連港其實已醞釀突破3元阻力，但之後港股free fall，大連港先逼住跟跌，但仍跌唔穿7月8日低位，擺到明係強勢股，最近喺2.5元附近亦靠穩，如果市況短線好轉，佢點都會炒番轉，現價買，博佢呢轉反彈見3元，呢兩成水位睇嚟唔難兌現。
下個星期先係後市的關鍵，留番下星期先再討論。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文