女神tea time：
強國請向阿Sa學嘢
■早前「Sa霆戀」分手告終。 資料圖片
「Sa霆戀」分手告終，阿Sa強調冇第三者，分手後表現大方。講真，情侶間要和平分手尚且唔易，更何況一個大企業家要同一個國家講分手？就算超人講幾多次冇撤資都好，《人民日報》最新嘅評論，好聽
就係話「目送」佢離開，難聽就係「好行夾唔送」。查實超人想當初會投資中國，都係覺得中國有機會發圍，有利可圖先去投資。
80年代，因為擔心香港前途，一間接一間上市公司遷冊，超人力排眾議，堅持要同香港長相廝守。至於和黃第一次於內地投資嘅港口項目係鹽田港，當時同樣遭前董事總經理馬世民大力反對，但當時超人覺得唔搞就走寶，所以就算個個反對都堅持要搞。試想像你買嘅股份，跌到七個一皮，人人叫沽時你要堅定持有，你都會好淆，更何況講緊係億億聲嘅投資？難道風險成本唔係成本？
當日鹽田港個簽約儀式更出動最高規格，時任國務院總理李鵬都有出席，幾乎當超人係外國元首。點解咁重視？說穿了都係你見人有錢，先覺得唔可以得失人。一段因為錢而建立嘅關係，最後一方因為錢而合情合理分手，另一方呢個時候先來講感情，一句講曬就係賴皮，有失大國氣度。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文