金融High Tea 2015年9月22日
影視概念落鑊炒
2015年09月22日
美股杜指上周五雖然跌290點，港股亦跟隨低開300點，但跟住就企番穩，內地股市上升1.9%都幫到手。市場喺美國議息後，焦點開始轉番去習近平訪美議題。
習大大訪美唔止係政治事件，同時係經濟大事。未出發之前，先有環球片場主題公園落戶北京，再整單
華人文化基金同美國華納公司合作，好消息排住隊。
科網合作 料成焦點
呢次領導人訪美，焦點之一應係科技產業的合作。美國係網絡科技大佬，中國認為呢個市場發展歷史唔耐，差距無咁大，亦都全力投入爭奪市場，所以習大大訪問，對呢類公司發展有無好處，已經引起揣測，要炒領導人訪美，就要留意埋科網股呢瓣有無乜料。據陸羽仁收到風，美資科網企業打入內地市場可能有突破性發展，但呢啲消息對相關美國科網股係好消息，對中國科網股可能帶來新競爭，未必係好消息，盲目去買科網大股如騰訊(700) 未必得。反而係中美合資公司在美國搞高鐵，這個項目穩穩陣陣對鐵路股有支持，短炒炒呢個板塊易啲。
憧憬習大大訪美效應，推動內地股市先跌後升，上證指數重上3100關，深成指數重上一萬點大關，創業板指數更全日大升4.8%收市。
同內地一樣，恒生指數雖然低開300點，之後跌幅收窄，收市報21756點，跌咗163點；國企指數收報9899點，跌129點，成交縮至702億元。
藍籌股最矚目係《華爾街日報》爆料，指港交所(388) 行政總裁李小加於2003至2009年擔任摩根大通中國區主席時撰寫的多封電郵，顯示曾經向摩通推薦多名中國官員及客戶的子女，助其取得職位。報道指，推薦人士包括現任上交所總經理黃紅元的親戚。
報道出街後，李小加透過個人聲明回應，話已經無法記清摩通實習計劃和個別推薦聘任的具體細節，但記得當時摩通內部有一套正式程序處理這些事情，他完全按照程序辦事，聘用絕不是一人的決定。港交所主席周松崗就回應，話報道涉及的事件發生在李小加加盟香港交易所前，故不予置評，認為報道對李小加履行交易所的職務、以及港交所的業務無影響。港交所股價昨日收186.4元，跌0.6%。摩通呢單嘢突然燒起上來，不排除會續有下文。要留意新聞在外國燒起，有可能係「出口轉內銷」的部署，燒李小加未必係主菜，燒內地高官先至係正餐。
華納兄弟娛樂公司(見圖)與華人文化產業投資基金宣佈合資成立「旗艦影業」，影業股被炒起。電視廣播(511) 持有牽頭財團10%股份、等如項目5.1%股份，逆市彈升5.3%，報27.6元，以大股嚟講算係幾勁啦。電視廣播近排股價甚弱，只怕炒幾炒要再回頭試底，高追小心中伏。
股仔方面，橙天嘉禾(1132) 大升14%，報0.64元；天馬影視(1326) 彈升22%，曾經炒到開巷的阿里影業(1060) 反而只漲2%，由此可見細股只係齋炒。
天馬老闆炒作有前科
影視股炒味濃，但?家有質素股份真係唔係咁多，好似阿里影業(1060) 名頭夠大，但仍未真正有成績做出來。本港電影工業基本上唔係好制度化，暫時做唔到好大企業出來，人哋華納和華人文化基金合作，唔知關老闆公司乜事，故此炒作味濃烈。
炒影視股概念大過天，故此好多公司都係博賣殼變身。好似今年上市的天馬影視(1326) ，老闆係本地資深電影人黃百鳴，佢以前都搞過間上市公司，最後成功賣殼。天馬年初掛牌，公司主要透過集團建立的發行渠道於香港、中國及東南亞製作及發行電影。截至上年底止的中期業績，公司由盈轉虧近2900萬元，亦都無乜大動作。
早前，老闆黃百鳴集團決心進軍內地電影市場，包括在上海開設有「4DX」技術的戲院。之後公司披露可能配售新股份，股價狂升，六月份股份就一拆四，甚有玩財技味道，所以唔好睇佢依家係毫子股，實際佢上市價0.9元，折合現價0.225元，市值12億元，以一間一年上三部片，上市後就蝕錢的公司而言，升幅都唔算細啦。
另外，昨日講到隻酷派(2369) 與奇虎達成和解協議，昨日炒高14%，收報1.59元，升得太急好難追也。
陸羽仁
金融High Tea 舊文