財經評論：
澤鉅的5蚊雞
■李澤鉅早前宣佈長建與電能合併，電能股東要接受零溢價的換股比率，才可收每股5蚊特別股息。 資料圖片
流傳多年的都市傳說：有一日，李嘉誠不小心從口袋跌了1蚊硬幣落坑渠，千方百計想執回來。最後司機出手成功「打撈」1蚊雞，李嘉誠掏出100元打賞他。
故事說明了甚麼？有人話誠
哥唔願見到呢1蚊就咁無咗，失去貨幣流通市場的multiplier effect；又有人話誠哥有鋪執大餅癮，發達就是要這樣；亦有人話重點係畀100元司機個一份人情味（好似係）。
電能股東氣難下
李嘉誠長子、長和副主席李澤鉅兩周前宣佈長建（1038）合併電能（006），兩間公司股東可以收每股5蚊特別股息，但前提是6號仔股東要接受零溢價的換股比率（每股電能換1.04股長建）。同李嘉誠執銀仔故事一樣有趣：究竟6號仔股東執咗呢5蚊雞，可以得到甚麼？
合併後的「新長建」將是世界級基建投資龍頭企業，盈利前景毋庸置疑，但這誘因夠吸引6號仔股東接受零溢價換股建議嗎？股民鍾意買基建股，一早已經做長建股東，不用等合併。
派特別息又如何？查實新長建建議派發的5元息，根本是來自電能去年分拆港燈（2638）套現回籠的700億閒置現金。換言之呢5蚊雞是由6號仔出完豉油再出雞而煮成的，大廚李澤鉅一句「合併啦」就要同長建股東一齊「澤」（「食」的潮州諧音），電能股東有份食都氣難下。
上星期有報章引述「市場人士」，李澤鉅計算精準，情願合併不成，都唔會提價，無啦啦講呢啲，皆因至少3間外資行「作反」，近日異口同聲指換股比率唔吸引，都好明顯有大戶發功，試下李澤鉅底線。大戶有冇say？今年5月，電能建議向長建買債券，結果在50.24%獨立股東反對下而擱置，而今次合併只需10%股東反對便泡湯。雖然「市場人士」講到李澤鉅一定唔肯加價，但一日上市公司通告未寫「最後價格」，小股東不妨食住花生睇大戶與李澤鉅過招。
記者：孔雪茵
財經評論 舊文